E lē gata i lea a o le latalata o fesootaiga ma le galulue faatasi ma tamalii o le atunuu e pei ona ta‘ua, o le isi lea auala sa matuā fesoasoani tele mo le atinaeina o lona silafia o le galuega.
O le tausaga e 1985 sa maua ai le avanoa e galue part time ai i se vaega o le tautua a le leitio faavaomalo a Niu Sila, le Radio NZ. O le 3ZM (o se lālā o le Radio NZ) i Kalaiesetete sa faigaluega ai mo le faitauina o tala fou (News Reader) mo le leitio e pei ona ta‘ua.
E tasi ma le ‘afa tausaga sa galue ai faavaitaimi i le leitio a Niu Sila, ae galue fulltime i le ofisa o le Housing Corporation i Kalaiesetete lava.
O le faaiuga o le tausaga e 1986 sa malaga ai i Kanata mo le a‘oa‘oina le gagana Farani mo le tolu masina, ma sauniuni ai mo galuega i atunuu i fafo.
O le faaiuga o le tausaga e 1986 na siitia ai mo le atu Karapina (Caribbean) ma faamautu i St Lucia. Sa maua ai ma le avanoa e galue ai lē tumau o se faiaoga i se tsi o a‘oga i St Lucia, mo le a‘oa‘oina atu o le gagana Peretania.
O le kolisi a le Ekalesia Katoliko a St Joseph’s Convent, o le a‘oga e faapitoa lava mo na o teine, i totonu lava o lea atunuu. Sa maua foi lona avanoa e galue part time ai i le leitio a lea atunuu, le Radio Caribbean.
Na mae‘a le taimi sa iai i le atu Karapina, ona sososo ai lea ma le siitia i Roma i Italia i le 1989, mo le faataunuuina o le galuega sa feagai ma le tamā o le aiga poo lona toalua. Peitai e pei ona ta‘ua, e lei mālōlō ai le agaga saili malo ma le naunau ina ia silafia foi aga ma tu a lea foi atunuu tele.
O le ala lea sa saili ai foi mo se galuega, ma galue ai o se freelance reporter i Roma i le gagana Peretania lava.
O le vaiaso fou o le a faaauau ai le isi vaega tele e pei o galuega, pisinisi aemaise ai se tasi o faaeaea a le atunuu tele o Farani o loo umia i le taimi nei.
O le tasi vaega tele o le soifuaga e ala i taleni o le a faapea foi ona silasila i ai mo isi a tatou lomiga.
Ia manuia tele lenei vaiaso ma ona taualumaga.
