Ua mae’a le filifilia o ‘au a le NFL a le lakapi faa-Amerika mo taaloga o le 2020. Ua faamanuiaina ai le to’a sefulutasi o alii Pasefika fou ua filifilia mo ‘au eseese i totonu i Amerika. 

O se numera aupito sili lea ona maoa’e ma toatele o le filifilia o Polenisia fou e sefulutasi i le NFL Draft 2020. 

O tausaga taitasi e filifilia ai e le NFL alii taaalo fou ua mae’a ona taalo mo ‘au a Iunivesite eseese, ma ua sailia ni avanoa i ‘au tetele a le NFL. E na o alii na taaalo i Iunivesite e agavaa mo le Draft poo le filifiliga tele mo le NFL. 

E ova ma le 2,000 alii taaalo mai Iunivesite uma i totonu o Amerika e saili mo ni avanoa e taalo ai i le NFL. 

Ae na o le 224 i latou e faamanuiaina i le Filifiliga faapitoa i tausaga taitasi, e iai alii Polenisia ia e sefulutasi na saili manuia i le filifiliga o le 2020. 

O Tua Tagavailoa le alii Samoa na muamua valaau lona igoa. Na taalo o ia i le Iunivesite o Alabama ae ua maua lona avanoa i le ‘au a le Miami Dolphins. 

Na sosoo ai ma le filifilia o AJ Epenesa o le Iunivesite a Iowa e le ‘au a le Buffalo Bills. 

O le isi o Julian Blackmon na pikiina e le Colts a Indianapolis. O Julian na taalo i le Iunivesite i Utah. O le isi mai Utah na manuia o John Penisini na piki e le Detroit Lions i le filifiliga lona 107. 

E toalua alii Samoa na filifilia e le ‘au siamupini a le New England Patriots. O laua na faamanuiaina i New England o Devin Asiasi mai UCLA i Los Angeles ma Cassh Maluia na taalo i le Iunivesite i Wyoming. O Maluia na faaiu i ai filifiliga a Le Draft 2020. 

Na faamanuia foi ma Keith Ismael o San Diego State na filifilia e le Washington Redskins i le filifiliga 156. Sosoo ai ma Bradlee Anae na manuia i le filifiliga 179, o le Dallas Cowboys na filifilia Anae mo le latou ‘au. Na faamanuia foi ma le alii Tonga o Leki Fotu na maua lona avanoa i le Arizona Cardinals. O Fotu na taalo lakapi muamua ona sui ai lea o lana taaloga i le lakapi faa-Amerika. O alii Samoa uma ia.

Na faamanuia foi ma le alii Tonga o Netane Muti ua maua lona avanoa i le Denver Broncos, ma le isi alii Tonga o Alohi Gilman na piki e le Los Angeles Chargers. O le filifiliga o le 2020 ua atoa ai le fāsefulu o alii Samoa ua i totonu o le NFL. E 30 ‘au a le NFL o loo taalo ai alii Polenisia ae o le toatele lava o Samoa. 

O le ‘au fou o le a taaalo faatasi ma isi e iai Star Lotulelei, Christian Tago, John Lotulelei, ma Matt Asiata (New Orleans Saints); Danny Shelton (Cleveland Browns);  Shawn Lauvao (Washington Redskins); DJ Tialavea o le Atlanta Falcons; Manti Te’o o le Los Angeles Chargers; Marcus Mariota (Las Vegas Raiders) ma isi. Ua maitauina e le NFL ma Amerika atoa le matuā toatele o alii Samoa i totonu o le NFL. Na faatalanoaina lenei mataupu i le toaitiiti o tagatānuu o Samoa ae e matuā toatele ana tamafanau o loo taaalo i le NFL pe a faatusa i isi atunuu.