Ua savalia nei le 8 masina talu ona faapaleina le tamaitai sa avea ai ma tausala o Samoa mai Aotearoa Niu Sila, o Fonoifafo McFarland-Seumanu ma Tausala o Samoa faapea foi le Tausala o le Pasefika i lenei tausaga 2020. O Fonoifafo o loo aumau ai ma lona tamā i totonu o Samoa seia mae’a lana paeaiga o iai nei, o le Tausala o Samoa faapea foi le Pasefika. O le pepesi ai ma aafia o le lalolagi i le faama’i o le Koviti-19, ua lē mafai ona faataunuu ai nisi o faigamalaga mo Fonoifafo sa faamoemoe e malaga atu ai i atunuu mamao i polokalame e faalauiloa ai Samoa i le itu tau turisi.
I le talanoaga a le tatou nusipepa ma le tausala o Samoa ma le Pasefika, na ia faailoa ai, e ui i le aafia ai o le lalolagi i le faama’i i lenei vaitau ma tapunia ai faigamalaga a vaalele ma ua leai ai ni turisi o toe malaga mai i Samoa, ae o loo tele nisi o ana galuega o faia ai i totonu o le atunuu.
E faatolu i le vaiaso ona galue Fonoifafo i le Matagaluega o le Soifua Maloloina e ala lea i le siakiina o gasegase ma fesoasoani i tausi soifua i le faia o fusiga faatasi ai ma tui o fanau laiti. Na faamatala e Fonoifafo le faagaeetia o lona tagata i le tele o taimi e malaga ai ma le aufaigaluega a le Soifua Maloloina i tua i nuu ma afioaga e faatino tuipuipui o fanau faatasi ai ma le faia o siaki faafoma’i o tamā ma tina matutua, e maeu le tali mai o le atunuu aemaise o nai aiga e ala i le lagolagoina o ana galuega ma le faate’ia o i latou ina ua ia talanoa atu i ai e faaaogāina ai le gagana Samoa. O nisi o i latou ua fesiligia o ia, pe faafefea ona lelei lana faasamoa ae sau mai Niu Sila.
Fai mai Fonoifafo, o se faamanuiaga tele mo ia lenei tautua ia Samoa e lē gata ina avea ai o ia ma Tausala o Samoa ma le Pasefika, ae o le faaaogāina o lona tomai faatausi soifua. O le isi ana galuega o iai nei e pei ona avea ai o ia ma Amepasa o le kamupani telefoni o le Vodafone lea sa avea ma lagolago malosi o le Tausala Samoa i tausaga taitasi. O loo faaaogāina e le Vodafone Samoa lona tagata i le tele o a latou faalauiloa e lē gata i luga o leitio, televise ae faapea foi le social media. O se tasi o lu’itau tele o feagai ai ma Fonoifafo, o le taumafai lea e faasoasoa lelei lona taimi mo ia galuega.
O lana faamuamua o loo ave ai i le ofisa o Turisi a Samoa ona faasoasoa lea o lona taimi i le Matagaluega o le Soifua Maloloina ma le kamupani o le Vodafone Samoa.
O se tasi o poloketi o loo faatino e Fonoifafo i le tele o taimi, o le taumafai lea e aoao mai meataalo mo le fanau poo toys mai nisi o Fale Fa’inifo faapea nisi o ana uo o fesoasoani atu ia te ia, o ia toys e faameaalofa e Fonoifafo mo fanau i le taimi e faia ai o latou tuipuipui.
O nisi o nei meaalofa e aofia ai paste ma pulumu e fufulu ai nifo e tuuina atu i nisi o aiga pe a oo ina malaga i tua i nuu ma afioaga le Tausala o le atunuu. Na ta’ua e Fonoifafo lona faia ai o ni tusi ‘aisi i se taimi muamua o lona olaga ma momoli atu i nisi o pisinisi ma kamupani ma le naunautaiga e maua mai ai ni toys mo le fanau. Na talileleia e nei kamupani ana tusi ‘aisi e pei ona maua mai ai le tele o toys ma isi meataalo mo le fanau laiti. Fai mai Fonoifafo, o se tasi lenei o auala ina ia faafiafia ai le fanau i le taimi e faia ai o latou tuipuipui.
O Fonoifafo foi o loo gafa ma le faatautaia ai o nisi o facebook pages e pei o le Public Health ina ia faalauiloa ai polokalame a le Soifua Maloloina, aemaise lava o puipuiga, faatasi ai foi ma le Facebook Page a le Miss Samoa Pageant, lea e tele ina faalauiloa ai vaaiga matagofie o Samoa aemaise o nisi o polokalame e auai i ai le Tausala o Samoa ma le Pasefika. E tasi lava le itu o loo faatalitali i ai Fonoifafo i le taimi lenei mo le avea ai o ia ma Tausala o Samoa ma le Pasefika, pe e toe faaopoopo ai se isi taimi mo ia pe leai pe afai ae lē faataunuuina ai le sailiga o se lalelei o Samoa ma le Pasefika ona o aafiaga o le Koviti-19. Fai mai Fonoifafo, o loo ia fai mea faalogo lava i le Pulega a le Ofisa o Turisi a Samoa i le taimi lenei ona e foliga mai e lē o iai ma se tonu mautu auā e faalagolago uma polokalame ma tonu fai i le taimi e te’a ese ai ma maua ai se vaifofo o lenei Koviti-19.
O se fiafiaga tele mo Fonoifafo le avea ai o ia ma Tausala o Samoa ma le Pasefika ma malaga mai ai ma faamautu i Samoa. Ua telē se faamalosiau mo ia i Samoa ina ua nonofo faatasi ai ma si ona tamā. E matuā faafetaia e Fonoifafo lenei avanoa ua ia galue ai i Samoa ona o le faigofie o se sootaga mo ia ma le tele o tagata maualuluga o le atunuu ua mafai ona feiloai atu i ai e pei o le Ao o le Malo, o le Palemia, Minisita faapea faauluuluga o soo se Matagaluega ma Faalapotopotoga i Samoa. Fai mai Fonoifafo, ana faapea o lea lava e galue ai i Niu Sila, e leai ma se sootaga faapea e na te maua. E ata lava Fonoifafo ma faamalata le tele o nisi o faamanuiaga ua ia maua i Samoa e pei o le telefoni taugata mai le Vodafone Samoa, o lana internet e faaaogā fua e leai se totogi, o le tele o puletasi e maua fua mai kamupani o lagolagoina o ia faatasi ai ma le nofoaga o aumau ai nei o loo totogi uma e le Malo o Samoa. O le mau a Fonoifafo, Ua aogā lona taimi i Samoa, e lē gata i le avea ai o ia ma Tausala o Samoa, ae o le faaaogāina foi o lona tomai faasoifua maloloina o se galuega e pele i lona loto ma maua ai le avanoa e feiloai atu ai i le tele o aiga mai nuu ma afioaga i tua atu o le Taulaga o Apia.
Na faafetaia e Fonoifafo le tapuaiga a ona aiga ma ona mātua, o kamupani na lagolagoina o ia, o le community a Samoa i Niu Sila, aemaise o Samoa atoa ona o le faaaloalo ua tuuina atu ia te ia. E lē gata i le taimi lenei o avea ai o ia ma Tausala o le atunuu ma le Pasefika, aemaise foi o soo se taimi e malaga ai i ni sauniga ma ni faatasiga a nuu ma afioaga. O loo iai le faamoemoe o Fonoifafo e toe taliu i Niu Sila e faaauau ai lana aoga pe a mae’a lona taimi i le pale o le Tausala o le atunuu ma le Pasefika. Afai e toe foi i Niu Sila o le a ia taumafai pea e faalauiloa ai le vaega lenei o le Miss Samoa e pei ona faamanuiaina ai lona olaga ma maua ai le avanoa e galue ai e tautua i ona tagata Samoa. Fai mai Fonoifafo, e tumau pea i lona mafaufau le ola galue mo Samoa seia oo mai i lenei taimi, e lē o iai foi sona mafaufau i le taimi lenei mo se faaipoipoga pe a mae’a lona taimi i le Tausala o Samoa ma le Pasefika.
O Fonoifafo McFarland-Seumanu, o se tamaitai Samoa na ola mai i totonu o Niu Sila, o se tamaitai Kerisiano e faatāua ia te ia lona va ma le Atua faapea foi lona aiga ma lona atunuu. Ua tele nisi o vaega o le soifuaga ua ia maua mai a’o avea ai ma Tausala o Samoa, e lē gata i le maua ai o lona malamalama i le itu tau turisi, o le aganuu a Samoa aemaise o le olaga faasamoa moni na faavae mai e mātua ma tuaa ua lagomau mai i ti’asa. O se tamaitai Samoa e mitamita tele i lana aganuu aemaise o le siva Samoa e sausaunoa ai se taupou Samoa. E iai le talitonuga o le tatou nusipepa, o le galuega faatausi soifua o Fonoifafo o se tasi lenei o vaega o lona soifua ua viia ai e tagata i Samoa e ese mai i lana pitolaau o le Tausala o Samoa ma le Pasefika.
