E oo lava foi ina ua toe taliu i Samoa mo lona atunuu, e molimauina e oo mai lava i le taimi nei, le tele o agavaa ma le faaaogāina o lona soifua e faalauiloa ai taleni ua faatamaoaiga ai.

O le tele foi o isi vaega tāua o lona soifua e lē o mafai ona aliali mai a o lei feiloai atu i ai le tatou polokalame.

Vaimasenuu Zita Sefo-Martel (Bachelor of Arts in History and English – Canterbury University)

O Vaimasenuu Zita Sefo-Martel sa soifua mai i ona mātua; o lona tamā o Tago Sefo Aloalo Ioane mai le afioaga o Samusu i Aleipata, Saleilua-Poutasi i Falealili faapea Nofoalii.

E tupuga mai o ia iā Fanene Toosavili Tuatagaloa Simaile I. O lona tina o Vaelenoatia Letalu Tago Sefo mai le afioaga o le Tuiatua Faanofonofo ia Fuataga i Lalomanu i Aleipata.

Ua faaipoipo atu Zita Sefo-Martel i se alii Farani ma ua iai foi o la alo e toafā.

O nisi o faigamalaga i vaega eseese o le lalolagi o le a ta‘ua i lana talafaasolopito mulimuli mai, ona o le tele o galuega sa maua e Vaimasenuu ma lona aiga.

Soifua aoaoina

Sa amata aoaoina i le aoga maualalo a St Marys i Savalalo, ona sosoo ai lea ma le ulufale i le kolisi a St Marys i Vaimoso mai le tausaga e 1976 i le 1979. Na maua le  avanoa e sikolasipi ai i fafo ma faamae‘a ai le vasega fitu poo le Form 7.

O le tausaga 1980 na maua ai lona avanoa e sikolasipi ai i fafo ma faamae‘a ai le vasega fitu poo le Form 7 i le aoga maualuga a le New Plymouth Girls High School i Niu Sila.