O matai mai le afioaga o Asau sa molia i le faia o se taupulepulega e alofia ai le faia o le amiotonu, ua faamamāina nei o latou suafa mai ni aafiaga tau solitulafono ina ua lē faamaonia o latou moliaga i le faaiuga a le Faamasinoga Maualuga. O moliaga e aofia ai le taupulepule e faia se faaiuga ua āfaina ai le aiā tatau o lē na tagi.
O le mae‘a ona suesue molimau o le mataupu na taunuu ai le faamasinoga i se faaiuga, e lē faamaonia moliaga ona o molimau na tuuina atu e le itu tagi ua lē mafai ona faamaonia ai tuuaiga ma moliaga. Sa finau le itu a leoleo o le faaiuga na faia e le nuu ua aafia ai aiā tatau o Masoe Niko.
Peitai o molimau a leoleo na tuuina atu e lei manino ai poo le ē tonu lava le mafuaaga o le faaiuga.
O le isi tulaga na aliali mai i molimau tuu fofoga a le itu tagi ma le itu tetee, e feteenai mau i le mafuaaga na faatulai ese ai lē na tagi ma lona aiga, ma e lē na o le tagi na ave e Masoe Niko faasaga i le nuu na mafua ai, ae e iai ma isi faaiuga a le nuu na te lei usitaia lea na mafua ai ona faia le faaiuga e faatulai ese.
O se faaiuga a Asau na faia i le aso 7 o Ianuari o le tausaga e 2007 na faatulai ese ai Masoe Niko ma lona aiga, ina ua lē usitaia e le itu tagi tulafono ma faavae a le nuu mai tausaga ua mavae, e sa ona ave e se isi le finagalo o Aiga ma Salafai i le Faamasinoga.
Na faatulai ese foi lea tamalii ona ua ia lē logosaia le faaiuga e lē mafai ona faataunuu le faamataiina o se tasi o ona alo ona o se tamafai.
O le molimau tuufofoga a le afioga Masoe Niko a o faagasolo taualumaga o le mataupu ia Aperila o le tausaga nei, na faailoa ai e Masoe Niko i le faamasinoga o lona alo tama sa tuu e matai ua maea ona liliuina faaletulafono ma na faateia o ia i lea finagalo o le nuu ona o lona talitonuga e toatele foi isi tagata o le nuu o tamafai ua ave i ai suafa matai.
Na faaalia lava e lea tamalii i lana molimau e iai lona talitonuga maumaututu o lona taofia o ni nofo sa faia e se tasi o tamalii ma ia faaulu ai se tagi i le Faamasinoga o Fanua ma Suafa, o le mafuaaga lava lea na toe sui ai le finagalo o le nuu i le saofai a lona alo ae ua uma ona malilie mai le nuu o le a usu faaaloalo atu i le faaeeina o suafa matai o lona aiga.
Faaalia e Masoe Niko i lana molimau, o le tulafono a Asau e sē ona ave e se isi o le nuu se mataupu e aafia ai le finagalo o Aiga ma Salafai i le faamasinoga ua lē talafeagai ma tulafono ma le faavae o le Malo o Samoa ma o lona tuuina atu o le mataupu i le faamasinoga o le a mafai ona faasagatonu ai lea tulaga ma maua ai le soifua fiafia o le afioaga ma ona tupulaga o le lumanai.
E toavalu matai o loo molia i le faia o le faaiuga faasaga i lea tamalii o le nuu ma ua folasia i le faamasinoga le maliliu o le toalua, toatasi ua gasegase ua lē mafai ona oo ane i le faamasinoga, ae toalima o loo tulai e tali i moliaga.
E sefulu molimau a leoleo o loo tuuina atu i le faamasinoga e lagolago ai moliaga faasaga i ia matai o le afioaga o Asau.
