Minisita o Faamasinoga ia Faaolesa Katopau Ainuu lea sa tuuaia i le toesea o faila mai le Faamasinoga i Mulinuu

E ono toe faia se isi suesuega a le Matagaluega e Pulea Tagata Faigaluega (PSC) i faila ia na toesea mai le Faamasinoga i le tausaga ua mavae. 

O lea mau na faaalia mai e se tasi o aiga na oo atu e faaulu le latou mataupu i le Faamasinoga, peitai, na matuā paso se tasi o le aufaigaluega a le Matagaluega e saili faila a le aiga.

E faatolu na fesili le tamaitai pe iai nisi igoa o loo faamau ai le mataupu ae tali le tina o le suafa o le Sa’o o le latou aiga lea e iai faila. E faatolu foi na alu le tamaitai ma toe foi mai e aunoa ma se faila. 

Na toe tau saili se isi igoa peitai, na oso a’e le ita o le tina e ona le mataupu ma avaavau loa. Na oo lava tala a le tina i le taimi na pisa ai i faila ia na tuua’ia ai le afioga i le Minisita o Faamasinoga ia Faaolesa Kakopau Ainuu, lea e faapea na toesea mai i ni auala faasolitulafono.

Na maua le avanoa e faatalanoa ai e le sui o le nusipepa lea tina, ae na ia ta’ua ua faalua na oo atu i Mulinuu i le vaiaso lava lea ma e lei mafai lava ona maua faila a lona aiga.

“E lagona le faanoanoa tele ona e atagia mai e lē iloa poo fea ua ave i ai a matou faila.”

E iai mataupu ua alia’e mai i  le va nonofo ai o lea tina ma nisi lava o ona tauaiga, ma o le mafuaaga lea o le agai o ia i le Faamasinoga, e fia maua faaiuga o nisi o mataupu a lona aiga ua mae’a ona tagofia e le Faamasinoga. 

A’o iai la i le Matagaluega o Faamasinoga, na ia tapa ai e fia maua faaiuga o lea tausaga ma lea tausaga, peitai, ua siliga sailiga a le tamaitai sui resitala.

Na toe tulitatao atu le tina ma faapea, o lea na te iloa ua mae’a ona toe faafoi atu faila nei i totonu ina ua pisa ma alia’e ai o le Minisita e ona le faatonuga na toesea ai faila i le taimi muamua.

Na faamalulu ane le tamaitai ma faapea mai, e iai isi taimi e toesea ai faila ona o ni mataupu o loo tagofia i luma o le Faamasinoga i le taimi nei, ae lelei le toe oo atu i le vaiaso lenei, ae se’i saili mai totonu.

Na malie le tina ma faapena ona tau to ane le sela, ma toe faaauau le talanoaga ma  le sui o le nusipepa. Na iai masalosaloga o le tina i nisi o ona aiga o loo tautua i le Matagaluega, peitai, na fautuaina o ia e se tasi o ona tauaiga, ina ia tusi i le faauluuluga o le Matagaluega e faaali i ai le mea ua tupu ma fesili i le PSC pe mo’i na toe faafoi ia faila i le Faamasinoga.

Na  tapa e le sui o le nusipepa se avanoa i le ofisa o le PSC auā o latou ia e suesueina mataupu faapenei, peitai, e lei avanoa mai se isi e gafa tonu ma lea vaega. Pau le vaega na faamalamalama mai  e se tasi o le aufaigaluega, ina ia faia se tusi (complaint) ona tuu atu lea i le ofisa ina ia lima taitaiina ai la latou pitolaau.

Na ia faaalia foi, e soo se mataupu lava faapenei, e oo lava i ai suesuega a le ofisa, e pei ona faia i faila a le aiga Faumuina ma Ainuu lea na toesea mai i le Faamasinoga i le tausaga ua mavae. Na ta’ua foi e faapea, o le tuai atu lava o le tusi, o le tuai foi lea na migoi le ofisa.