Vaimasenuu Zita Sefo-Martel (vaega 1)

Faamalo atu i lenei foi vaiaso fou, aemaise ai o lenei masina fou ua tatou aulia mai, a o tulitulimatai ai le agai atu mo le faaiuga o lenei tausaga i ona galuega ma tiutefai i soo se matata o loo fitaituga ai muliauma eseese o le tatou atunuu.
Talofa, Talofa lava, Malo le Soifua Manuia

O le tatou itulau o lenei vaiaaso, o le a sei o tatou asia tasi laufanua o le atunuu, ma liliu i Samoa sei molimauina se tasi foi o tamalii tamaitai o le atunuu, ua tele foi ni vaega o le soifuaga ua ia ausia a o iai i ona tausaga talavou o lona soifua. Atonu e manaia foi le felafolafoai o le tatou galuega i Niu Sila ma Samoa, aemaise ai o loo iai lava le naunautaiga mo soo se tasi lava, ae poo fea lava e alaala ai.

O le mea tāua, o le maua o le avanoa e feiloai i ai ma faasoa mai le tamaoaiga ma tulaga manuia o le soifuaga.

E talitonu le tatou itulau poo le ā lava le toatele ma le anoanoai o tagata o le lalolagi e aofia ai ma Samoa, o le mea moni e tofu lava le tagata ma le meaalofa ua tuu i ai e le Atua ina ia galueaina ma avea o se faamanuiaga mo aiga atunuu ma soo se tasi lava, ae silisili ona viia ai lona Suafa Paia.

E lē gata i le tulaga ua siitia i ai i lana galuega faapolofesa o loo tautua ai i le atunuu, aemaise ai o se matatia fou ua ia laasia ma ua avea ma mafuaaga ua logologoa ai lona agavaa, ma le taleni ua foai i ai e le Atua.

E ui ina sa āma pe lei matuā toto‘a i ai le silasila a nisi i le galuega poo se taleni sa tofia i ai lea foi tamalii, peitai sa maoae lona faatinoina o le galuega, ma ua faaeaina ai foi Samoa i le va ma le motu i Sasae poo Tutuila i se tasi faagatama e lauiloa ai Samoa.

O se tamalii tamaitai e talenia tele toe saili malo, e lē gata i lea a o se tagata finau tele foi mo le manumalo i soo taumafaiga ma soo se tausinioga lava e auai ai.

O le tulaga tau aoaoga, galuega ma taaloga e maitauina ma atagia ai  i le soifuaga o Zita, o se tasi e faaoloaina ma faamealofaina e le Atua i taleni ma agavaa eseese e pei ona molimauina.

O soo se atunuu lava foi o le lalolagi sa malaga tafao ma asiasi iai, sa lei mālōlō ae sa taumafai lava ina ia tofo ma ulufale i totonu o galuega a ia atunuu.