E latalata i le 100 i latou na fai ma sui o le atunuu, na agai atu i le solo taavale na amata mai Satapuala e agai atu i le Malae o Faautugātagi a Samoa i Tiafau i le Aso Faraile na mavae nei. O le mau ia soloia tulafono taufaaofi e tolu ia o loo ua i le Komiti Faapalemene i le taimi nei.

O nisi e mai le faalapotopotoga o le SSIG, e lē gata i lea o le pati o le Faamuamua Samoa. Sa ta’ita’i atu lea solo e le Afioga Afamasaga Tamanana Tasolo, e oo lava i fanauiti ma tupulaga talavou sa auai i ai mai afioaga eseese ina ia malosi ma amanaia le mau.

O le finagalo o lea solo sa tuuina atu i ala o le faafeagai ai o tupu ma tamalii, o le atunuu i le tu ma le aga Faasamoa o le avafatafata, ma sa fofogaina lea e le Afioga ia Afamasaga. O upu e faapea, “Ia soloia tulafono ona e ogaoga ma matautia.”

O lea solo o loo latou ta’ua le mau a Tumua ma Pule lea sa saili ai le malo o le atunuu, ma o le oo atu ai i Tiafau i lea lava taeao ua faailoa e lagolago atu i le galuega o loo ua i lima nei o le komiti, atoa ai ma le tuualalo i faiva o lea komiti o loo ua alo atu i ai.

Na talia ma le agaga faafetai e le Komiti Faapalemene o loo taitaifono ai le tamaitai faipule ia Gatoloaifaaana Amataga Gidlow, e pei ona fai ai le Gafatasi ia Fuimaono Sam Te’o ma fofoga e talifuaitau i le solo filemu.

Solo Filemu

“A’o lo outou afifio mai, se faafetai, ua lē tuua lo tou tiute fai o matai o nuu, o matai e tausi aiga, leaga e te puipui i au measina, o le ala lea o le toe tatala atu o le avanoa, e aumai le tofa, aumai le faautaga, ma le tuualalo i le paia o le atunuu. Aisea? O le tatou sā tatou te iai uma i totonu, e iai le manatu, a goto, goto lava ia Samoa.”

“Lafo mai le faamoemoega, o lea ua māua ma sāua i le va lo tou finagalo, o le sae lena o faigamea. O le agaga ga faa-Samoa. Le faafesagai o kupu ma kamalii. Auvakū aumaī, ma kakou kilokilo i se mea e maua ai le filemu ma le fiafia o kagakaguu o Samoa.”

O le manatu o le tofa Toi Tuifaasisina Taefu Pauli o se tasi o tamā matua e ui i gasegase ae sa toso atu lava lana wheelchair i lea taeao sa ia faapea mai, “E lē tutusa lo’u malamalama ma loia o loo iai la latou mau i tulafono ua faataatia nei mo lona pasiaina. Na pau lava lea o le mea e oo i ai lo’u lagona o eleele o le a faoa foi, atoa ai foi ma le tulaga i le aganuu i eleele ua tele ina leai, e pei ona iai le taimi foi o Siamani lea sa o ae tuu, omai foi Niu Sila ma toe o ae tuu lava eleele o Samoa ia. 

O lea la foi e iai nai pagupaguga i le tulafono ma tulaga faapena, o lea o loo faapea ona tumau pea eleele o afioaga ia i le malo e pei ona iai i na vaitaimi, atoa ai foi ma le tulafono i matai e pei o Sa’o o aiga, o lea ua taoto mai le finagalo o le Malo ia e pei la o tulaga na o le matou omai.”

E tele ina tasi le mau a sui na auai i le solo i tulafono, peitai, e mafuli a le tele o finagalo e oo a i tupulaga talavou i le tulaga e manatu ua fia pule le tulafono i le mataupu e fitotitonu i aiga. O se tasi o tupulaga talavou na faaalia lona finagalo e lē o agai lava i isi tulafono ae pei lava o le tulaga lea i matai o loo ia faapea mai ua fiapule le tulafono i le filifiliga e patino i aiga.

O le Aso Lulu o le vaiaso nei, o taeao lea o le a faafeagai ai le Komiti ma le solo lea i le tuuina atu o la latou mau tusitusia atoa ai ma fesili o le a fesiligia ai le Komiti e tusa ai o nei tulafono taufaaofi.