Le Tagaloa Pita, ao saunoa i le taimi o faagasolo le fono a Tautua Samoa

Pe afai ae manumalo mai le Vaega faaupufai a le Tautua Samoa, i le palota tele o le tausaga fou 2021, o le a toe faafoi lava le Faavae o Samoa i le mea na iai. Pe afai e taunuu ona pasia e le Palemene o iai nei a le HRPP teuteuga ma suiga tetele e tolu e pei ona logo ai Samoa atoa.

“Afai ae pasia teuteuga o le Faavae e pei o le lua o Faamasinoga, e tavavae ese ai le faamasinoga o Fanua ma Suafa ma le Faamasinoga Maualuga (Supreme Court), o le Faalima o Matai Sa’o o Aiga, ma isi suiga teuteu o le Faavae 2020, ua folafola e le Tautua Samoa, o le faitalia o loo i lima o le atunuu i totonu o le 10 masina o totoe nei. 

Na saunoa ai le sui tauva o le Tautua Samoa mai Savaii, afioga a Le Tagaloa Pita, “Ae e tulai mai o le faatuatuaga o Samoa, o le Tautua e ta’ita’ia le faigamalo mo le isi lima tausaga o lumanai, e matou te soloia uma lava mea ia, teuteuga ae toe foi e fai le Faavae e pei ona iai. 

“Leai se mea matou te faia, pe ‘alo ese ai. Ae afai foi e talitonu le malo lea a le HRPP e pulea nei le atunuu, afai e talitonu latou i le aiātatau a tagata, a oo ina toe foi le pili lenei i le atunuu, ma o atu le atunuu e fai le palota, e fai le palota i le loto fuatiaifo o faipule e 50 o le maota e faia le palota.

Pei ona faia e le HRPP, ina ua avatu le mataupu faasaga i le Peresetene o le Faamasinoga o Fanua ma Suafa, (Land and Title) sa fai le latou palota ina ua faatu atu e le Palemia ma faalua e le Sui Palemia, e faate’a le Peresetene o Fanua ma Suafa, peitai, na fai ane le palota ma aumai le faaiuga sa lē maua le lua vaetolu, o lona uiga e toe tauave lava le tofi Peresetene e Fepuleai i le Faamasinoga o Fanua ma Suafa. “Talosia ia musumusuina e le Atua, le Palemia ma le HRPP, e fai le latou palota i le pili o iai nei.” “E manatu foi le Tautua, ua afua ona faasulusulu le faiga o le Tulafono, ona o le ese o le talitonuga o lenei vaitau ma vaitau ua silia i le 30 tausaga i tua atu. E lē mafai ona faamalieina tagata uma, auā e iai lava ē malo ma ē faia’ina.

O le faavaa o iai nei, i le faamasinoga o Fanua ma Suafa, a lē fiafia i le iuga, e faasolo lava i luga. Ae o le tele o isi faaiuga o taoto e lē o mafai, ma e lē lagolagoina e le Tautua.

I le fonotaga a le Tautua Samoa ma Tusitala i le vaiaso talu ai na latou ta’ua ai, “Maimau pe ana soifua mai tuaa, auā o ni faaiuga e lei faigofie. Ua tatou ola i le age of information.

“O mea ua uma ona tilotilo i ai mātua na fafauina mai lenei Faavae. E lē o toe feola mai tuaa e tali mai i tuua’iga nei, e tasi lava le amiotonu tatou e o i ai.

“Ae foliga mai ua manao le Palemia, e ese le pulega e ta’ita’i i ai Fanua ma Suafa, ese le pulega o faamasinoga maualuga. “Ae fai mai le tusi, e lē mafai ona e tautuaina ni matai se lua. O lea ua lua amiotonu. O le fesili tele mo le Komiti o iai nei.

“Ae o le talitonuga o le Tautua Samoa, matou te aveesea le tulafono. Auā matou te puipui i measina a le Atunuu, ia amanaia a tatou fanau i le lumanai.

“Peitai o le mea muamua, e tatau ona manumalo mai le Tautua Samoa i le Palota tele. Auā o le mea o iai nei, i le HRPP, e fai nei lava le iuga o suiga nei e tolu a’o lei oo i le Palota tele o le tausaga fou.

“O le maitau a le Tautua Samoa, e na’o na faataunuu lava o le taotoga o le tulafono ae ua uma ona aita le fingalo o le Palemia. Pei e foliga mai e iai se mea e tulimatai, ina ia maua pea le manu lea e tulituli, i le saunoaga a le Tautua Samoa. 

“Afai ae tofia le Tautua Samoa e taitaia le malo, o lona uiga na ala ona tofia ona o le manaoga o le atunuu, ia faasa’o mea sese.

“Afai ae pasi le tulafono lenei, ae tulai mai le Tautua e ta’ita’ia le malo, ua matou fai loa auala e aveese ai tulafono nei, aemaise pe a tulai mai le Tautua e na te pulea le Palemene.

“Ma o le fono lava e aveese ai. O le tulafono o eleele e lē mafai e lē mafai, poo se soalaupule poo le taamilo o le Komiti, tasi lava le mea e fai, o le 2 vaetolu o le palota e suia ai. Afai na pasia e le majority o le Palemene, e aveese foi e le Majority o le Palemene. 

“O le fono muamua lava pe a uma le palota o le fono lena ia Me 2021, faasauni ai lea ma pasi le Budget o le 2021 i le 2022, o iina lava e mafai ai ona fai. Afai ae ave le faatuatuaga i le Tautua Samoa, o le tulaga lena e oo i ai, ma ia o lava i le Faavae, ma aloaia e tasi le fono faitulafono, tasi le pulega, tasi le faamasinoga o le tulafono, ma agai loa e faaleleia le Aao lea o le Faamasinoga o Fanua ma Suafa. Ma ia lava le tamaoaiga e tuu i ai, e faatino ai ma faatupe a latou Galuega.”

“Ua uma ona taoto le matou fuafuaga, i le fofoina o le faafitauli e pei ona iai i le faamasinoga o fanua ma suafa. O se manaoga sa aumai sa tele ina aumai e le faamasinoga i fono a le komiti o tupe, ae lē talia, aua sa ese le mea na agai i ai le faamuamua.

“E lē o le tali lea o le vaelua o le faamasinoga. O le tali o le ave sa’o lava o le tamaoaiga lea e faatagisia mai, o ā uma a’oa’oga e faaleleia ai ma latou e lagolago, ma le puna’oa e faaleleia ai.

Auā e tasi lava le faamasinoga, e pulea mai ai, ae lē lua amiotonu e mulimulitaia, o le faavae lena o le Atunuu, o le Atua e faamasino foi i le amiotonu e tasi a le Atua, ae lē o le lua.”

O le auga o folafolaga a le Tautua Samoa, o le latou soloia lea o teuteuga o le tulafono o Fanua ma Suafa pe afai ae pasia e le malo o iai nei.