O nisi o i latou ua tele tausaga o fesootai ma le faatautaiga o Faaaliga Tausala i Samoa na fesoasoani i le sailiga o se tausala a Tokelau auā le faaaliga tausala o le Pasefika.
O i latou ia e aofia ai le tamaitai Samoa muamua na pale i le Tausala o le Pasefika le tamaitai o Verona Lovel Ah-Ching Parker faapea ai Kevin Schuster, o se tasi ua tele tausaga o galue i le faatautaiga o sailiga tausala mo le Iunivesite Aoao o Samoa.
O le talosaga a i latou na faatautaia le sailiga tausala a Tokelau na tali atu i ai i latou ia ma faapea ai loa ona malaga atu Verona faapea Kevin ma nisi o sui o se komiti na faatautaia ma faamasinoina lea taumafaiga.
E toaono tamaitai na tausinio i lenei tauvaga ma o le faalua lea ona saili se tausala o Tokelau lea ua faaigoaina o le Tautiti Tokelau.
O le tuutuuga sa iai ina ia faaulufale mai tamaitai e toalua o le motu ae e lua motu na maua mai sui e toalua ae toatasi isi motu.
O komiti a tina o motu taitasi na feagai ma sauniuniga a tamaitai tauva ma o le motu o Atafu na faatautaia ai le sailiga o le tausala o Tokelau.
E lima vaega na vaevae i ai le tausinioga ma na aofia ai le laei ua faaaogā i ai le ie solosolo, o le tauvaga taleni, tauvaga o taliga fesili, tauvaga o laei o le po ma tauvaga o laei faaleaganuu.
O le manumalo o le taliga o fesili o le tausinioga o le tausala lea o Fakaofo, Meleka Mativa, 18, ua pale nei o le tausala o Tokelau mo le isi lua tausaga.
O ia foi na manumalo i le ie solosolo o le tauvaga. O ia lea o le a fai ma sui o Tokelau i le sailiga o le Tausala o le Pasefika i lenei tausaga.
O le mau a i latou mai i Samoa nei sa auai atu ma faamasinoina lenei tausinioga, e maeu foi le naunau mai o motu eseese i le lagolagoina o a latou sui tauva.
O se faiga foi ua manino ai le tele o tamaitai ua mafai ona ofi mai auā le tausinioga i le sailiga o le sui o Tokelau e alu i tauvaga tausala.
