E silia i le 10 miliona tala le tau atoa o le galuega ua mae‘a ai nei ona toe faalelei atoa le Maota o Tooa Salamasina mo le Lautele o le atunuu. O se igoa lea ua toe faaigoa ai e le Minisita o le Matagaluega o Tina ma Tamaitai, Atina‘e o Nuu ma Agafesootai le Maota tele sa ta‘ua lava o le Maota mo Tina ma Tamaitai i Sogi.
“O se nofoaga lenei ua lē gata ina fuafua mo potopotoga a Tina ae faapea foi faauluuluga o le atunuu aemaise Tupulaga Talavou ma le fanau,” o se finagalo lea na faaalia e le Afioga Fiame Naomi Mataafa ina ua ia tatala aloaia lenei galuega i le vaiaso ua tuanai.
O se galuega lenei ua fausia i le va galulue faatasi ai o le Malo o Saina faapea ai ma Samoa ma o le Malo lava o Saina na fausia le uluai Maota o Tooa Salamasina lea ua toe sagai ane e faatino le toe faaleleiga atoa o lenei galuega tele. O le faaiuga o le tausaga na tea nei na tapunia ai ofisa o lenei Maota tele ae toe faatautaia loa le galuega o le toe fausia atoa poo le toe faafouga o lenei nofoaga.
O se konekarate e ta‘ua o le Shanghai na o latou faatinoa lenei galuega ma na faaalia e le tamaitai Minisita o le tāua o le mae‘a ai o lenei galuega tele ona o lea o le a mafai ai loa ona toe tuufaatasia vaega uma o le Matagaluega i ona ofisa i se nofoaga se tasi e ese mai i le Maota o le Malo sa iai nei atoa ai se isi vaega i Matagialalua.
O le faafoiuga lenei ua vaaia ai le tele o le nofoaga o le a faaaogā ai ea malulu, e ese mai i le nofoaga muamua lea na tele ina faaaogā ai ili e alu i le eletise. Ua silia foi i le 10 tausaga o le fausaga muamua ma o le mafuaaga lea o le manatu o le Malo ua talafeauga le toe faaleleia atoa o le tino o le maota a o lei toe tuufaatasia le Matagaluega i ona vaega eseese.
O le samiga o lenei fale tele ma le toe tatala ai i le atunuu na faatautaia ai loa ma le laugatogi taualoa o lenei tausaga a le vaega o Tupulaga Talavou a le Matagaluega, lea na tufatufa ai faailoga mo galuega ma atina‘e ua maoae lo latou faatinoga e tupulaga talavou na faaofi atu a latou pisinisi i le Matagaluega mo lenei tauvaga ua faatautaia i tausaga eseese.
O Ofisa o le Vaega o Tupulaga Talavou, le Vaega o Tina ma Tamaitai, le Vaega o Pulenuu atoa ai isi auaunaga ua faatautaia e lenei matagaluega ua i lalo uma o le fale fou lenei ua toe tatala atu ona faitotoa i le mamalu o le atunuu auā a latou faatasiga. O lea galuega ua faamoemoe e maea i le tausaga fou ma tatala ai i se vaitaimi o le masina o Oketopa 2011.
