Na mae‘a lea ona ulufale loa lea i le Iunivesite i Canterbury i Niu Sila lava mo le 4 tausaga. Sa faaiuina ma faauu i le faailoga o le Bachelor of Arts, e faapitoa i talaaga o atunuu o le lalolagi ma le gagana Peretania. (History and English).
O nisi o tamafanau a le atunuu sa iai faatasi ma Zita i lea Iunivesite, o le afioga ia Vaatuitui Apete Meredith, o ia lea sa avea ma Konesula o fefaatauaiga a Samoa i Niu Sila.
O Moefaauo Titimaea o loo avea ma pule o le ofisa o le vai i le atunuu, faapea le susuga ia George Latu sa logologa i le tulaga o le pou malosi a le Manu Samoa, ae o loo galue o se alii Loia i totonu lava foi o Samoa.
Aoaoga faavaitaimi mo le faalauteleina o isi tomai
Sa a‘oa‘oina le agavaa faatusitala ma le faasalalau i Aukilani mo se taimi e lei umi, ona sososo ai lea ma se tasi foi aoaoga faavaitaimi i Montreal i Kanata ma Farani, mo le a‘oa‘oina o le gagana faa-Farani.
E ono masina le taimi faatulagaina e a‘oa‘oina ai le gagana faa-Farani mo soo se tasi e fou atu i ai.
Peitai o se faamatalaga a Zita sa ia ta‘ua ai, e na o le 3 masina sa ia faataunuuina ai le a‘oa‘oina e pei ona manaomia.
Galuega faavaitaimi
A o feagai ai ma aoaoga i Niu Sila, sa fai ma malaga e asiasi i aiga i Samoa pe a tuua a‘oga i Niu Sila. O taimi uma e toe foi ai i Samoa mo tuuaga, o taimi foi ia e galue ai faavaitaimi i le leitio faasalalau a le atunuu le 2AP. E toatele nisi o tamalii o le atunuu sa ta‘ua e Zita, sa latou galulue faatasi i le galuega faasalalau i lena vaitaimi.
O le susuga ia Tino Pereira, Ati Ilaoa, Ulafala Aiavao, Pio Sioa o lē ona le Newsline i Samoa e oo mai i le taimi nei. O le susuga ia Tupai Joe Brown ua maliu, sa avea ma alii pule o le News Room i lea vaitaimi, a o le susuga ia Leniu Jimmy Moore sa faatonusili i le 2AP.
O tausaga uma sa galue lē tumau ai i le leitio a le atunuu, o taimi foi ia sa faalauteleina ai lona tomai i lea foi galuega.
