E savali lava le teine ma tau sulu ona e pei o se tagata o loo savali i le ea ona ua taavilivili atoa le ulu i le faateia i le mea lea na tupu nei i le library.
Oka foi se matautia o le meaalofa a le alii na saunia mo Luama. Ua faateia le teine i le talatala atu o le meaalofa, o lana filifili auro o loo tautau ai le penina maoi poo le pearl, ma se mitiafu ua uma ona lolomi ai i tua lo la ata faatasi, ma se faaupuga o loo tusi ai i lalo ifo o le ata, “In Love Forever”.
Ua matua tei lava Luama e na te le iloa e iai so la ata faapea ma le alii o Pula, ae na ia toe manatua, o le po lea na o ai ma Pina ma Aolele i le valaaulia a Pula i le asofanau o lona tausoga lea sa fai i le Katano, lea na tapue ai o latou ata.
Ua toe gaugau e le teine le ofu ma fafao mea uma i totonu o le pusa na aumai ai, ma toe tuu i le ato. Na taape ane loa tamaiti i totonu o potu aoga ua uma le assembly, ona faatoa savalivali ane lea o Luama i fafo ma agai atu i lo latou potu.
E pisa lava tamaiti i lena taeao ma feofeoai solo ia latou piliota, ae o le teine na pau lava le mea o loo agai i ai le mafaufau o Luama o le fia maua mai o ona lipoti mai le pule, ma faatofa i nai ana uo sa masani lelei i ai, ona toe foi loa lea i le fale.
Na tele faamavaega a le teine i lea aso, ua taufai saini uma foi ana uo i lona ofu aoga, ma lana api na avatu faapitoa lava mo le saini ai o tamaiti ona o lea o le a alu e lei maua mai le tusi tausaga a le aoga. Na ta le malologa ma o le vaaiga uigaese lea ua vaaia e tamaiti, o si teine o Luama o loo fekamiai solo ma lona ofu aoga ua lilofia uma i tusitusiga.
