Tauulaula o le alofa vaega 56

Na vave foi ona taunuu i ai Siaosi ma lana peni matamata tetele e fai ai lana saini. E malie lava le saini a Siaosi aua fai mai ana upu, “Sis, aua nei e faagalo mai matou, aemaise lava you know …” ona alu ai lea ma isi mau upu ma le mau ha, ha ha.

Ua oo i le piliota mulimuli ona alu loa lea o Luama e vaai le pule mo lona lipoti ma isi tusi na tau ane e le pule e tatau ona alu ma ave e tuu atu i le pule o le aoga i Niu Sila o le a aoga ai.

O le mea malie, e fai uma nei faamavaega a Luama ma nai ana uo i le aoga, e leai lava faapea ua tagi le teine pe faanoanoa, ae na o le ata lava ma fai tala malie ma tamaiti. Ae ai ona o lea ua tuu ane le tusi a le pule, ma ua pei ua taia ai nei le mafaufau o Luama, o lea ua peiseai ua saini faauma ese lona igoa mai le lisi a le Kolisi o Samoa, na tei ai lava ua faafuasei ona tagi a o faafesagai ma le pule.

Ua tagi masusu nei le teine, a o taumafai e faafetai atu i le pule mo lona taimi na aoga ai i le kolisi. Ua tulai mai si tamaloa pule, ua tuu mai i ai le pusa pepa solo ma tago mai le pule ua milimili lona patua “aua e te tagi ae fiafia o lena o le a e alu i Niu Sila e faaauau au aoga.

Tau ina ia e iloa, e le gata o le a e alu ma ave le igoa o lou aiga ma ou matua, ae o le a e tauaveina foi le igoa pele o le Kolisi o Samoa. A e alofa la ma pele ia te oe lenei laumua, ia e tauivi malosi la ia maualuga sau taumafaiga i au aoaoga i Niu Sila, aua o le tauleleia foi lena mo le kolisi atoa.”