O le tinā mataala

O Litia ma Mika e toafa le la fanauteine, ma tama e toalua. E ui lava i le toatele o le fanau a le ulugalii, ae ese le mataina i totonu o le nuu ma le ekalesia, ona e le mafai ona sepu se teuga a se tamaititi mai lava i lo latou laiti, lea foi ua faasolo ina matutua, ae o loo tumau pea le tausiga faatoaga a lo latou tina i lana fanau.

O nisi ulugalii e moomoo maimau e, pe ana toatele faapena se la fanau, aemaise e le gata ina aulelei uma foliga o tamaiti, ae leai foi se tamaititi e ama mai i o latou tulaga atamamai i totonu o aoaoga.

O Mika e galue faakamuta i se tasi o kamupani tele i Apia, ae o le fafine o Litia sa faiaoga muamua a o lei toatele ni tamaiti, peitai na toafa loa tamaiti, fai loa le faaiuga o le a nofo Litia e faamautu uma mea i le fale ma faamautinoa le tausiga lelei o tamaiti, aemaise o lea e toatele i le fanau teine.

O le nuu o Soloa e leai se faiganuu se tasi, ona o se nuu na faatoa faato‘a e le malo le eleele, ma amata loa ona faatau solo atu i tagata o loo fia saili ni fanua e latalata i le taulaga. Lona uiga, o le nuu lenei e mai i ma o o le lalolagi o loo faia ae ai, ma e iai lava le eseesega ma le tele o nuu e mautu faiganuu, aua o Soloa, e toetoe lava pei se nuu papalagi, e pule lava le aiga ia i le latou sikaili.

O le nuu foi lea e vaaia ai mau foliga eseese o le tupulaga, e fai o ulu uumi, o ulu e matua matautia lanu eseese ua vali ai, o ava e toetoe oo i tauau, ae o teuga foi a fanau tamaitai, e fai lava sina matautia o nei tu ma aga e faaali ai. O le tele foi o aiga e tulelei uma i le itu faaletino ma maua mea, ma e aulelei ai foi foliga o fale, ma e toetoe lava leai se aiga e le tu se taavale afi i luma poo autafa o se fale.