Tauulaula o le alofa vaega 56

O upu faamalosiau nei a le tamaloa pule, le tamaloa e ese le alolofa i ai o le aoga i ona uiga tausaafia ma le tamalii, lea foi ua toe faalogo tasi atu i ai le teine i lea aso, ua avea o se faamavaega sili ona taua i lona mafaufau. Ua solo mata o Luama ona tu lea i luga ua faatalofa mai i le pule, ma tuu atu i ai le tusi na aumai i ona matua e tuu sao i le pule, ma savali ese mai loa i fafo.

Ua faatofa atu nei Luama i le laumua sa mitamita ai i aso uma na te ofuina ai le togiga e tausinio uma i ai fanau a Samoa latou te fia ofuina. Ua faatali i si ana uo o Pina ona fai lea o le tonu a Luama, ae a pe a fai i si tama o Siaosi e sau lau te o faatasi i tai, sei fai le treat a Luama ia laua, o Pina ma Siaosi.

Ua faavave Pina e sue mai Siaosi, ma na talia lelei e le sipai a Pula lea tonu ma agai loa le toatolu lenei i le taulaga ma faasasao loa i le faleaiga o McDonald i Apia.

Toetoe tolu itula o iai pea le vaega lea i le faleaiga, ua leva lava ona uma latou meaai, ae o loo talie ai lava ma toe faasolo uma tala o le taimi atoa na iai Luama i le kolisi, aemaise lava o lea ua faatoa masaa mai lava lea o si tama ia o Siaosi, i nei mau aso e tele na sasao atu ai Pula ia te ia i ona moomooga mo Luama.

O le aso foi lea na faatoa tautino ai le solo a Siaosi ia, i lona manao sa iai mo Luama i le taimi muamua lava na faamasani atu ai Pina ia te ia, ae na vave ona toe omiomi i totonu si ona manao, ina ua talanoa atu lona matai o Pula, o ia o le a avea ma tama sooupu i le va o Pula ma Luama.

E faia pea