Leaga foi lenei alii o Pula e le fiu e suesue auala, aua e tau minoi loa foi si teine o le a savali ese mai fafo mai le potu, ae toe taofi atu lava e Pula le lima ma pulatoa mai i ai. “Luama, ailoga a ou toe maua lava se isi taimi paganoa faapenei mo oe seia oo ina e alu i Niu Sila.
Atonu ou te alu atu i lou faaeega, ae mautinoa o le a le mafai ona ou sogi atu ia te oe i lena aso aua o le a tumu ai lou aiga. Faamolemole Luama, ae a ea pe a e sei faataga maia ita sei ou sogi tasi atu lava ia te oe?”
O Luama lenei ua matua tei lava i le faapo lea ua fai ane, ma ua tau oso ane ai foi ma lona ita, ae i le taimi e tasi, na toe mau manatu le teine, e iu ina toe vevesi le mea ma toe aliali uma atu ai lava i le aoga lenei mea sa manatu e alu ese lava ma laufanua o le kolisi e le o iloa tele e nisi. Ua tutu le teine ma mafaufau ma faataupupula atu ia Pula e aunoa ma sana tala, ae ua na ona lue atu i ai o lona ulu.
Tafefe, e lei fia lava ni lue a Luama, ae tago lima lua mai loa le alii aoao, ua opo faalatalata atu le teine ia te ia, ma sogi malie ane i ona foliga. Muamua na sogi Pula i le muaulu o Luama, sosoo ai ma le sogi i lona alafau, seia oo lava ina lagona e le teine ua mafanafana ae ua susū foi ma ona laugutu, ua oo ifo i ai le faasologa o sogi a le tama o Pula.
Talofa e, i le teineititi lotomau, e ui lava o lea ua peiseai ua pau lona maumauai i lea taimi, ae lei iai se gaoioiga a Luama e faapea ai ua manao i le mea lea ua fai ane e Pula.
E lei sili atu lava ma se minute na sogi faamavae ai le alii aoao i le teine, ona ia tuu loa lea o Luama e sau i fafo mai le potu. Sa toe faafetai le teine mo le meaalofa ma savali atu loa agai i le faletaele o teine aoga, ae agai Pula i lona potu e faatali ai le o ane o lana vasega.
