O loo saofai Luama ma avau le pese latou i pese ia ua faasolo e faatalitali ai le taimi e amata aloaia ai le assembly, ae ua tei i lona faalogoina o le papai atu o lima o le tagata i ona tauau, ma le faliu mai o le tama ave meli foi o Siaosi. “shh, fai mai le kama e te alu atu faamolemole la e faatali mai totonu o le potu tusi.’
E pei lava e leai se mea tele o tupu ia Luama, na ona lue atu lava o lona ulu ia Siaosi, ona toe saofai lava lea ma pese, lea na faapea ai Siaosi, e foliga e le alu Luama i le poloai. Peitai na tulai Luama ma toe savali atu loa i le potu tusi lea na tau ane.
Ai o le tau umi o le taimi lea na faatali mai ai Pula, ma ua manatu e le alu atu le teine, na fetaui tutu ai lava i le maulu atu o Luama i totonu, ae ua savali mai foi Pula e foliga o le a toe sau i fafo.
“Oi, hullo! Faapea lava au ua e le sau foi sei e talia tasi si ota manao i lenei aso” Ua ataata lava Luama e pei lava e le o popole i nei tala uma e fai ane. “E a, o le a le mea na e manao atu ai ou te sau?” E lei uma lelei atu le fesili a Luama, ae tago mai Pula uu atu le lima ma tuu mai i ai se ato meaalofa, ma o le vaai a Luama, o loo iai i totonu se isi afifi o loo afifi i se pepa lanu auro.
“E poo a foi nei mea ua e gaseā i ai. Ou te le o faatalitalia lava se mea mai se isi. Ou te le manao e faatigaina se tasi i lau malaga, o le mea taua lava ia taunuu manuia lou faamoemoe ma manuia lau aoga, toe foi mai tatou toe faatasi iinei.” E fai lava tala nei a Luama, ae ua ia vaaia le susu o mata o si alii aoao, e ui o loo taumafai e faasaga i luga e tau talitali ai le toulu ifo o ona loimata.
“Ama, e ese le faigata o le mea lea o le a ou oo i ai pe a e alu ese. Ae maimau e, pe ana e alu ese, ae o loo ou iloa tonu lava le itu o lou fatu lea o le a ou faatali atu ai. Ae o au o le tagata o le Atua, ma o loo mafanafana lava lou loto i le musumusuga a le agaga o le Atua, e iai lava le taimi o le a faamalieina ai lou galala lea a ta matelaina ai.”
E faia pea
