“E a ea? Oka se pepelo o le alii aoao ma lana tala lena ua fai.” Ua faasaga lelei mai nei Luama ia Pina e foliga o lea o le a tala laupipi uma i ai le latou talanoaga na fai ma ona matua ma le alii o Pula, ae ua toe tau lava le mafaufau o Luama i le tala a si ona tama, ia alofa aua nei soona faalauteleina i nisi le latou talanoaga, e alofa foi i mata o le alii aoao nei masiasi.
Ua tuufesili nei Pina ia Luama poo le a le uiga o lana tala e talapelo le alii aoao. Pe o lona uiga e lei taliaina lana tomaaga anapo a o lea ua alu fai nei faamatalaga sese.
E lei talia e Luama fesili ia a Pina, ae ua na o le saofai lava ma lulu le ulu. O ona foliga e le o mautinoa pe faanunumi ona mata o loo ita, pe faanunumi i le le mautinoa pe mata sa malamalama lelei Pula i nei mau tala na latou faia.
Ua toe tau nei le mafaufau o le teine, letioa lava a pei e le matua faanoanoa foliga o Pula ina ua faaiu latou tala, ae o ana aga uma i lea afiafi e foliga o loo tau atu ai, e malosi lava lona mautinoa, e toe faatasia lava laua ma Luama.
Ua toe mafaufau Luama i lana tala sa fai faapea, “afai lava o le finagalo o le Atua e tatau ona tuufaatasia o ta loto i se olaga faapea i se aso o i luma, e tele auala mamana a le Atua ta te toe fesootai ai”. Tafefe, lona uiga o le fasi fuaitau lenei o lea ua pipii mau nei i le loto o le alii aoao, lea la ua faaliliu loa e Pula, ua talia lana tomaaga, pau lava le mea lea e toe tuai ai, o le taimi e faatino ai.
Ua atili ai nei ona le mautonu Luama pe tatau ona alu i le aoga i le aso e sosoo ai pe leai, aua o lona uiga, o le a fai le faaaliga tele a Pula i le fia selau o mata ia e tilotilo ane. Lona uiga e alu i Niu Sila ma le mafaufau o le aoga atoa, o ia lea ua fai le faamau ma Pula. Ua fai fai lava tala a le au tamaitai, ona toē lea ma agai mai i fafo e tapena se latou lamu o le afiafi.
O Pina o loo fai lava lana saka ma pese fiafia, ae o le teine o Luama lea e faia le kaleve eleni, e moni lava o loo pisi ona lima e tipitipi le aniani mo le kaleve, ae o loo taulai atoa lona mafaufau i le mea lenei ua tulai mai.
