Ua faasolo pea mafaufauga o le teine, poo le mea o le a toe agai sao lava e fai loa sana folasaga faaiu ia Pula, ae ua toe tau foi lona mafaufau, lona uiga e toe toso ai foi lenei lava mataupu, e iu ane ua tele lagona le fiafia, ona le manaia ai foi lea o lana malaga pe afai e alu ma lona iloa, ua manu‘a ni lagona o nisi ia te ia.
Fai loa ma le faaiuga a le teine, ‘okay la Pula, afai o lou fia lototele lena ua fai, ia o le a ou le toe pisa atu lava, ae tuu pea oe e fai lou fiafia, ae faatoa e iloa lava le uiga moni o au upu, pe a ou tulaueleele i Niu Sila.’
Ua ata le teine i lana gaoioiga lea o le a fai i le aso e sosoo ai pe a alu i le aoga. Ua faasolo pea si a latou afiafi ma talie ai lava i luga o le laulauai a o faasolo le kaleve eleni ma fai latou tala malie, aemaise ua tele lava le ula o le loomatua i si teine o Luama, pe mata na te toe manatua mai nai tama ia sa ai mai le vale ia te ia.
O le poto foi ia o le teine e teu lona inoino i alii uma nei e toalua, ae e tali fiafia lava ma ata, ma fai ana tala, ‘se aua le soona faia nai a ta uo. A ou alu i Niu Sila, ou te toe foi mai lava au ia ma te ipo ma se tama Samoa e lelei e alofa faamaoni i lo ta aiga.’
O tala lava nei a le teine e sese uma ai tagata faapea o loo fiafia Luama i nei mau gasu e fai ane i ona autafa, ae latou te le iloa le mea moni, o le matua inoino mataivi lava o le teine i nei gaosa. E tasi lava le mea o loo taulai i ai le vaai a Luama, o lana aoga ia faaiu manuia, aemaise o se tomai ia faasino e le Atua mo ia e faaaoga lelei i ai lona ia olaga talavou, aemaise le tautiga o nai ona matua e fai lana aoga.
Ua malama le Aso Faraile, ma o se vaaiga ese lea ua toe vaaia e si loomatua o Filo, ina ua toe ulufafo uma mai le au tamaitai ma o la togiga Kolisi, aua ua fai si umi e na o Pina lava e fai ona ofu aoga, ae fealualuai lava Luama ma ofu ese, ae o lea la ua toe maulu le teine i lana pave lanu moli ma si ofutino samasama. Ua faamanuia atu le loomatua i lana fanau aoga, ona o loa lea o le autamaitai.
E foliga e taunuu teine i le kolisi e lei taunuu atu le alii aoao, ona sasao lava lea o le autamaitai e saofafai i laina o a la vasega i le malae e fai ai le assembly i taeao uma.
