O le tausaga e 1987 na toe faaipoipo atu ai le alii o Faleiva, i lana manamea fou, lea ua lua i ai ana faaipoipoga ua fai, le tamaitai o Telena.
O le gugulu ia o le aso o le faaipoipoga, ona e moni lava sa fiafia ma gasolo atu tagata valaaulia ma a latou meaalofa, ae toetoe lava maua mai e le pupula a si tama faaipoipo, foliga le fiafia o nisi ia te ia, aemaise lava i tauaiga ma uo mai le itu a le tamaitai faaipoipo.
E foliga e ala ona toatele le au le malilie, ona fai mai latou, ‘ua maumau si teine aulelei ma le atamai, aemaise o sana uo muamua lava lea ua fai, a o lenei foi ua nofo ane o le tamaloa ua uma ona fai le toalua.’
Aemaise lava i loomatutua o le aiga, na iloa lava i le aso o le faaipoipoga le inoino i si tama faaipoipo, ina ua valaau le siva a le aiga o le teine, na tau fai malagalaga uma i luga loomatutua ma fafine o le aiga o Telena, agai mai sii ae i luga le latou teine, ae leai ma se isi na sōsō ane e sii si tama o Faleiva e pei ona masani ai foi lena ituaiga o fiafia a le Samoa.
O le mea moni lava, sa iloa lelei e Faleiva uiga le fiafia o le toatele o tagata o le aiga o Telena, ae ua onosai lava ma taumafai e malamalama i ai, aua e moni lava lagona faivavale o si aiga, o si a latou taupou lenei e faamemelo uma i ai, a o lenei ua gaoi pupula e le sogaimiti mai le Faasaleleaga le fatu o si tamaitai aulelei o le Tuamasaga.
O le isi faameo malosi a le aiga o Telena, ona o Faleiva, ua toalua lana fanau mai lana faaipoipoga muamua lea ua tatala. Ma e foliga pe a uma le faaipoipoga, e ono nonofo le fanau a Faleiva ia laua ma Telena, ma ua malamalama lelei foi ma fiafia i ai si teine, e ui o loo mimilo ai lava loto o ona matua.
