Peitai e le taitai ona amanaia e Telena na tuualalo, ae na pau le mea sa faasilisili i le agaga o le fafine, ia maua pea e tamaiti le tausiga alofa mafana lea e tatau ona la maua mai o la matua.
O nei gaioioiga uma a Telena sa lei misi i le matau a le tamaloa o Faleiva, ma o nisi taimi e le iloa atu e Telena, ae alu ese Faleiva i se nofoaga na o ia, ona tagi lea ma tatalo faafetai i le Atua, i lona foai mai o se ava ua sili ona faamalieina ai lona olaga.
E ioe Faleiva o le auga e tasi o lona naunau ia Telena ona o se tamaitai e lalelei tele, peitai e lei faapea na ia faataua se tasi e alofa moni i lana fanau, e ui lava sa talotalo le tamaloa, talosia e alofa Telena i si ana fanau. Peitai o lenei ua matua faamalieina le tamaloa i le alofa o si ona toalua fou, i si ana fanau, ma ua avea ai foi ma itu, ua amata ona faaleano tamaiti i lo la tina moni.
O le isi lena itu e maofa ai tele Faleiva, ona e le taitai taumafai Telena e taofi pe upuese tamaiti mai lo la tina moni. E oo loa i aso e tatau ai ona o tamaiti e tafafao i lo la tina, e tausolomua lava Telena ona tapena lelei o la lavalava ma mea uma mo le la o, ma e talanoa foi le fafine i tamaiti ina ia ola ae ma manatua e alolofa pea i lo la tina, tusa lava pe le fiafia i lona olaga o loo iai.
Ua moni lava le upu a le Tusi Paia, ‘o le mea lava e te lulu, o le mea tonu foi lea e te selesele maia.’ Sa faasolo pea ina matutua Lavasii ma lona tuafafine o Lupe, ma o ni tamaiti foi e atamamai ia la aoga.
E le faigofie i se tasi ona iloa e eseese tina o nei tamaiti, ona e le gata e tutusapau lava o latou foliga ma lo la tei laitiiti o Tiare, ae o le fealofani ma le alolofa o tamaiti matutua i lo la tei laititi, e ese le mataina o lea mafutaga.
