I le Suafa o Keriso Iesu e faatalofa atu ai i le paia ma le mamalu o Samoa.
E iai le talitonuga o loo manuia mea uma i le alofa o lo tatou Tama i le lagi. A o faalatalata atu le faaiuga o le lalolagi aemaise of mala o le a oo mai.
O le tele o taimi tatou te le manatu mamafa ai i le tele o mea ae taua tele ina ia mafai ona manino ma malamalama. O le taumafaiga lena a Ioane ina ia mafai ona maua le fesoasoani e ala i lona tusitusia auiliili pea o mea na vaaia ma mea e lei vaaia poo mea foi o le a oo mai.
O le mataupu e sefululima lenei o le Tusi o Faaaliga. E mafai ona faaulutalaina lenei mataupu e faapea, o leo o Agelu e fitu ma mala e fitu. O toe mala nei, poo le faaaumaina ai o le toasa o le Atua.
Ua latou pepese i le pese a Mose le auauna a le Atua ma le pese a le Tamai mamoe.
A o faia nei pesega ona vaaia lea e Ioane o se isi vaaiga ese. Faauta ua faaavanoa le lagi. O le malumalu o loo iai o le falefetafai o iai le mau.
Ona o atu ai lea nai le malumalu o agelu e toafitu ua iai mala e fitu. O agelu nei e ese mai i agelu e toafitu ma a latou pu e fitu ia na taua muamua. O agelu e fitu ma latou ipu o loo i lalo lea o le pu lona fitu.
Na vaaia e Ioane le tumu o le malumalu i le asu, ma le pupula o le Atua atoa ma lona mana. E le mafaia foi e se tasi ona ulu atu i le malumalu seia faaiuina mala e fitu a agelu e toafitu.
Ua lagona e Ioane le leotele mai le malumalu ua faapea atu i agelu e toafitu, ‘ona ia liligi atu lea o ipu o le toasa’ o le Atua i le lalolagi.
Silasila i mala poo ipu e fitu ia o le a sasaa mai e agelu. Muamua mai o le ipu na liligi ifo i le fanua. O le papala leaga e tiga ai tagata. Ua iai le faailoga o le manufeai. Atoa ma e ua ifo i lona faatagata.
O lona lua o ana ipu ua liligi ifo i le sami. Ua avea lea ma ala na liu toto atu ai le sami atoa. Masalo e manatu i le faaleagaina o le sami atoa, e tusa ma le tasi vae tolu lea na faaleagaina i le pu lona lua lea o loo taua i le mataupu e 8.
O le ipu lona lua o le a faapea ona faatamaiaina ai meaola uma i le sami. Tailo poo le a se finagalo o le Atua i le taimi e faatamaia uma ai meaola o le sami. Masalo o le a oo se lagona faigata i le Atua aua o le sami ma i‘a poo meaola uma na faia e le Atua, peitai o le a toe faaleagaina.
O le ipu lona tolu o le a faatamaia ai vaitafe ma vaipuna o vai ona liu toto ai lea (16:4-7).
Lui Ponifasio
Pastors
