I le sosooga mai o la tatou tala i le vaiaso talu ai, ina ua faafuasei ona toe ala le teine sa moe, ona ua ese le itu ua agai i ai lana miti malie lea sa fai. O le popolega o Lauama, ona fai mai nisi tagata, o mea nei o miti, e tusa o lena ua muai tau mai ia te oe se mea o le a tupu i lou olaga.
“Leai, e pepelo na tala, e leai lava se uiga o miti latou e fai, ona pau lava o le mafaufau o le tagata pe a moe,” o le tautalatala toatasi lea a le teine ma tu ae loa i luga toe faamafolafola lelei lona moega, ona fealualuai solo ai lava lea i totonu o le la potu ma Pina.
Ua tau le mafaufau o Luama, e tatau ona alu i le aoga i le aso e sosoo ai, aua o le aso mulimuli foi lea e tatau ai ona toe alu i le aoga, lana kolisi sa faananau i ai, a o lea ua le umi sona taimi ae ua toe suia ona o lona avanoa mo Niu Sila.
O lea e fia alu si teine sei toe faatofa lelei i nai ana uo i le vasega, ae pei e fa‘atu Luama e mafaufau i le alu i le aoga, ona e mautinoa lava e toe vaai ai foi ia Pula, aemaise o lea na tuu latou faigamea ma Pula ma ona matua, ae foliga mai lava i le tala a le alii aoao, o loo tele pea lona talitonuga, e toe foi mai lava le fuia i le esi.
Ua foi mai nei Pina mai le aoga, ae sa faatalitali lelei foi Luama, poo ai nisi tala fou a alu ane ma Pina. Na ulufale atu Pina i le potu ae o loo faataga u mai lava i ai le tua o Luama o loo tusitusi ana mea i se api, e peiseai na te le o amanaia le oo atu a Pina, ae o le mea moni, o lea e faatali poo le a foi se tala o lea aso.
“Hi miss Pula vi naka!” ua liai vave mai le ulu o Luama i le itu o loo alu atu ai le leo. “E a lau tala, o le a le uiga o lau tala?” o le fesili lea a Luama e pei e faalii le leo o loo momoli atu ai. “E a, vaai i le mimita solo o le kamaloa i legei aso i le matou malologa.
Ua a tetei ma Siaosi o la ma te nofonofo i lalo o le tamaligi ma ai ma keke saina, ae masau atu togi atu le $5 tala fai mai e faatau ai ni ma faguinu. Ou fesili atu ia Siaosi poo le a le mea ua ova ai le fiafia o lana tama, ae fai mai ua fiki le laki o le tamaloa anapo, ae foliga o lea sa uiga le tala a Siaosi, i le tou talanoaga lena sa fai ma ou matua.”
