Malamalama i le Tusi o Faaaliga (26)

Ou te faatalofa atu i le paia Samoa i ou tulaga faalupe. O ou paia mai le faavavau e oo atu i le faavavau e le mafai ona toe aisa e se tasi.

E iai le talitonuga maualuga o loo faapena ona manuia lenei aso i le alofa o le Atua i lana pule faasoifua faasoasoa mai i aso taitasi.

O lenei ua tatou iai i le vaitau o le Aso Maliu i le Kalena faaleekalesia i tausaga taitasi. Ua aga atu nei mea uma i le faamanuina o le maliu ma le toetu manumalo o le tatou Alii aua le faaolataga o le lalolagi.

O le faaolataga ma le fuafuaga a le Atua ina ia tatou maua le ola e faavavau na muai folafolaina mai i le uluai taimi na agasala ai le tagata i Etena. Na fetalai ai le Atua ‘o le a fanau mai le tama na te tuimomomoina le ulu o le fili.’

O lenei folafolaga na faataunuuina i le afio mai o Keriso ma faatoilaloina le fili e ala i lona toetu manumalo mai. Ae e foliga o se ata faasolo aua e lei oo i le vaega mulimuli o le ata lea e tau ai le taua mulimuli ma faatoilaloina ai le fili ma ana au e faavavau faavavau lava.

Ou te manatua aso o ou laitiiti, sa o atu ai le faitifaga i le matou nuu e vili ai ata tifaga i po o Aso Sa taitasi. Sa tele lava i ata karate o Bruce Lee ma ata kaupoe o John Wayne ma le tamaloa lea e masani ona faaigoa e toeaiina o Siaki Paleni.

Sa iai se tasi Aso Sa na o atu ai le au faitifaga i le tifaga peitai ina ua oo i le vaega e tau ai le sifi ma le tama autu o le ata, ae sue ane ua misi le uili e tasi. Ua galo i le aufaitifaga le uili mulimuli. Ona faatali ai lava lea o le au matamata pe a ma le 30 minute ae sau le tama i Apia e sue atu le uili. E leai ma se tasi na fia alu ona e le gata na totogi tupe ae o loo fia iloa le iuga o le ata.

Masalo o le vaega mulimuli lea tatou te faatali nei i ai, o le uili mulimuli o fuafuaga a le Atua i le mea o le a oo i ai le Tiapolo.

O le a faaumatia ana galuega ma ana au ma ana togafiti leaga.

O le talanoaga o loo tatou faia i le taimi nei i le Tusi o Faaaliga, o loo vaaia ai toe taimi o le tiapolo ma ana mailei. Ua ia iloa lelei lona iuga ae o loo taumafai ina ia toatele tagata latou te o faatasi ma ia i le teio ma le lepa afi.

Aua nei faaseseina i tatou.

I le mataupu e 16 o loo vaaia e foliga ua faavavevave ona faaauau fuafuaga a le Atua mo toe taimi o le lalolagi. Ua lata mai le taimi toe afio faalua mai ai Keriso, lē e autu i ai aso e gata ai o le lalolagi atoa ai ma le tiapolo.

Ua faalogoina le leo tele mai le malumalu i le lagi lea na vaaia e Ioane, ua faapea mai i agelu e toafitu: O ia inā liligi atu ipu o le toasa o le Atua i le lalolagi.

Na alu ai lea o le agelu sa muamua ma ia sasaa mai i le lalolagi le mala o loo i lana ipu. O le uluai mala lea mo i latou ua taina le igoa o le Manufeai i o latou muaulu poo latou lima taumatau.

Fai mai le mau a Ioane, ona oo mai ai lea o le papala leaga e tiga ai tagata ua iai le faailoga o le manufeai atoa ai ma i latou o e ua ifo i lona faatagata (Mataio 24).

Masalo e faatusaina nei papala i papala o Lasalo (Luka 16:21) ia poo papala foi na oo i tagata Aikupito i le faaulumalo o Farao (Esoto 9:9).

O lona lua o agelu na liligi ifo e ia lana ipu i le sami (3) ona liu toto ai lea e pei o le toto o le tagata oti, ona mamate ai lea o meaola uma o le sami. Masalo foi e faatusaina i le mala i Aikupito lea na liua ai le vai i le toto (Esoto 8:8).

Manatua le tatou talanoaga i le pu lona lua (8:8), na aafia ai na o le tasi vae tolu o meaola o le sami peitai ane a oo ina liligi mai le ipu lona lua, e leai se meaola e totoe. O le a faatamaia uma figota, o ia e oo i laau, ma amu o le sami.

O le a le toe iai se meaai e toe maua mai le sami.

O le ipu lona tolu na liligiina ifo e le agelu lona tolu i vaitafe ma vaipuna, na faapea foi ona liu toto uma. Ona faalogoina lea e Ioane o le leo o le agelu e pule i vai, ua avatu lana viiga i le Atua (5) ona faailoa mai lea e le agelu le uiga o le mea ua tupu ma le mafuaaga ua sasaa mai ai le toto i le vai. Manatua foi o le toto o le faailoga lea o le ola. E faapea foi le vai o le faailoga lea o le ola.

O le tala a le agelu e foliga mai o loo iai fetuu ma faamalaia i se faaupuga faapea “Ia ua tatau ai lava ona outou malaia e ala i le tuuina atu o le toto tou te feinu ai ma outou feoti ai aua o outou na faamaligiina le toto o tagata paia ma perofeta. Ua tatau lea mo outou”.

O le agelu lona fa na ia liliina mai lana ipu i le la ma tuuina atu i ai ia mu ai tagata i le afi. O le mea o le a tupu fai mai le mau a Ioane, na ia iloa ai tagata ua faifai i le suafa o le Atua, a ua le salamo ma avatu le viiga ia te ia.

E foliga mai o loo tuuavanoa mai lava le Atua i tagata e ui a i nei mala e tele ae sa iai lava le avanoa i tagata e mafai ai ona vivii atu i le Atua ma salamo i lea taimi.

Ona oo mai loa lea o le faasologa o le toasa o le Atua i le manufeai. Ua liligi e le agelu lona lima o lana ipu o mala i luga o le nofoalii o le manufeai ona faapouliuligia ai lea o lona malo. O le pouliuli o se mea faigata ma faafefe tagata aemaise pe afai o loo iloa ua tele ina faaleagaina le lalolagi ma ua tele ina leai ni meaai.

O le taimi o le tele o le fememeai. O le popole, o le fefe ma le atuatuvale. Oi talofa e, i nai tina ma fanauiti!

E ui i le matuitui o le tiga ae leai lava ma se salamo ae ua atili ai lo latou faifai i le Atua (11). Fai mai Ioane ua faifai i le Atua i o latou papala ma puapuaga, ae ua leai lava ma se salamo.

O nei tagata ua faamaaaina o latou loto. Manatua o tagata nei o loo i lalo o le pulega a le manufeai lea ua leai sona malo ma o nei tagata ua ulufia i le agaga o le manufeai.

O le ipu lona ono ua liligi ifo nei i le Eufirate le vaitafe tele. Fai mai le mau a le tusitala, o le mafuaaga ua faia ai lea tulaga ina ia mafai ona saunia o le ala o tupu mai nuu Sasae.

O le vaitafe o le Eufirate e afua mai i le mauga o Amenia ma tafi ifo i Asuria, ma agai atu i le nuu o Papelonia. Ona feiloai lea ma le tasi vaitafe tele o le Tikarisi ma tafe faatasi atu i Peresia poo le nuu o Iraq i nei ona po.

A o tutupu nei mea, na vaaia e Ioane agaga leaga e toatolu e pei o ni lane ua o mai i fafo o le gutu o le tarako, ma le gutu o le manufeai ma le gutu o le perofeta pepelo (13-14).

O nei lane poo agaga leaga o i latou nei ua auina atu e le tiapolo ina ia o atu i nuu uma o le lalolagi i ona taitai latou te tuu faatasia se autau e tauina le taua e faasaga atu i le Atua (15).

O le taua lenei e ta‘ua o le Taua i Amaketo. E pei o le taua na ta‘ua e Sakaria (Sakaria 14:1-4).

O le afio mai o le Alii o Iesu Keriso e tauina lenei taua e pei o le sau o le gaoi i le po (15). O lea e tatau ai ona tatou mataala.

O le aso foi lea na valoia ma faamatalaina e Paulo i le Ekalesia i Tesalonia ina ia mataala i ai. O le a afio mai le Alii e pei o le gaoi i le po (1 Tesalonia 5:2).

O loo faapea foi ona lapataia e Peteru le ekalesia Kerisiano i le afio mai o Keriso e pei o le gaoi i le po (2 Peteru 3:10).

Masalo o le feau foi lea mo i tatou Samoa. O le afio mai o le Alii o Iesu Keriso e pei o le sau o le gaoi i le po. Tatou te le iloa le itula ma le taimi.

A o iai le taimi, salamo nei i agasala. A o iai le taimi, foi nei i le Alii ma faatoese ia te ia ma ola mo ia. A o iai le taimi ma le avanoa, talia nei o ia e fai ma ou Alii ma ou Faaola.

Ia faamanuia mai le Atua ia te oe ma lau filifiliga ma o ia i lenei aso.

Soifua

Lui Ponifasio