E oo lava i o latou faafitauli tau faigauo ma tama, e iloa uma e le fafine, ma e le taitai ona ia osofaia lana fanau, ae faifai malie lava ona talanoa Litia i se tasi ua iai sona faafitauli faapena, ma e iu ane lava ua toe sologa lelei mea uma.
O le isi itu sa le mafai ona misi i le vaai mataalia a Litia, o le auala e fai ai lavalava o lana fanau teine.
O le uiga masani o fanau teine talavou e fiafia e faataitai sikaili fou o ofu ua ae mai, peitai sa iloa lelei e Litia, o le auala ua laei ai le toatele o fanau teine i lo latou nuu, ua matua le talafeagai.
Nai lo le na ona taofi la e le fafine o lana fanau mai lo latou oofu i nei sikali e le onomea, e faamautinoa lava e Litia lona talanoa i lana fanau i mafuaaga eseese ua faatetele ai uiga mataga o loo faia e tama ma tamaloloa i fanau teine.
E faamatala e le fafine, o nisi taimi ona o le tuinanau lava o le itupa o alii, peitai e tele foi se vaega o loo faia e nei fanau teine i lea faafitauli, e ala i le auala o loo fai ai o latou lavalava, ua avatu ai se avanoa i tama ma tamā e faaoso ae ai ni lagona lē mamā i o latou mafaufau. Ma o le talanoa faapea a le fafine i lana fanau, e vave ai lava ona ioe teineiti i le lē talafeagai ona oofu i na lavalava lē onomea.
O le auala lenei a Litia sa le tau manaomia ai lava ona ia taofi lana fanau mai na faatosinaga, aua ua iloa lelei e teineiti le auala e ao ona lavalava pe gaoioi ai i luma o ni tama, e oo lava foi i luma o lo latou lava tamā moni.
Maeu le manuia o galuega mamafa a se tina mataala! Talu mai ona ola le fanau a lenei ulugalii seia oo lava ina ua fai aiga o teine uma e toatolu, e leai se mea e gase pe faaletonu i totonu o lenei aiga. E lei tauvalea lava igoa o le fanau a le ulugalii i se mea i totonu o le nuu, le ekalesia poo a latou aoga foi.
Na pau lava le mea e iloa ai igoa o nei tamaiti uma e toaono, o moomooga ma faamatalaga faaamuia a tagata i ai, i o latou uiga tausaafia ma le amio lelei, ua matua vala lava ma olaga o loo ola ai le toatele o fanau ma tupulaga a le nuu o Soloa.
O le talitonuga o tagata uma e masani i lenei ulugalii ma le la fanau, o lenei talaaga lelei o le aiga ma faamanuiaga ua latou olioli ai, e mafua uma mai i le fafine mataala o Litia, sa lei moe lana vaai i taimi uma, auā se lelei, se puipuiga ma se tauleleia o lona aiga.
