O le tinā mataala

O le siomaga lenei e lei faatemeteme i ai le vaai a le ulugalii o Mika ma Litia a o tausi ae le la fanau. O le tele o po e talatalanoa le ulugalii i ni auala e tatau ona la mataala ai mo le malupuipuia o le la fanau mai aafiaga eseese ia e vaai atu i ai i le toatele o le tupulaga a le nuu, aemaise lava i le fanau teine, ona o lea e tele ina aooga faatasi ma isi fanau teine a le nuu.

E moni lava la i le tamaloa o Mika, ae ai ona o le vaivai i le tele o aso pe a manava mai lana galuega faakamuta, e le tele ai lava sona taimi e faaalu i lana fanau.

O le tele o afiafi, e manava mai lava Mika, saofai loa i lana fagu Vailima lapoa, e faatali ai le vela o se kuka a Litia ma lana fanau.

E oo foi ia latou lotu afiafi sa masani ona toetoe itula le uumi e fai ai ona o le tele o tautalaga faufautua a le tamaloa i lona aiga, ae ua seasea lava toe tupu lena mea.

Ua toetoe lava lē atoa se 20 minute o se faiga lotu afiafi, ae fai loa le tatalo o meaai, ma uma atu ai lava lena afiafi mo Mika i lona aiga.
Peitai o le fafine o Litia, o lana lea tauloto i aso uma ma po uma, o le faamautinoa o loo ia iloa uma mea o loo tutupu i olaga o lana fanau uma e toaono. Ma e faapolokalame uma foi e le fafine ona taimi i lana fanau, e na te fua lava i le taimi e tuua mai ai tamaiti mai a latou aoga.

O lana fanau teine e toatolu e matutua uma, lea e sosoo uma lava a latou vasega i le Kolisi a Samoa, ma o se fiafiaga lea ia Litia le taimi na te vaaia ai si ana fanau ua savalivali atu i lo latou fale, aua e fai sina mamao ese o le fale mai le auala tele lea e tuu ai e le pasi.

O le isi teine e i le va o tama e toalua, aua e sosoo le tama i teine matutua e toatolu, ona toe va lea i le isi teine, ae uii ai loa le tama, lea ua 5 ona tausaga ma ua alu foi i le tulagalua a le latou nuu, lea e iai faatasi ma le isi toalua.