O le tinā mataala

A o lei oo atu la le fanau teine matutua mai le kolisi, e muamua savali Litia i le aoga tulagalua lea e na o le tasi lava le poloka o fale e va ai latou, ona toe savavali faatasi mai lea ma si ana fanau.

Ma o na taimi uma, ua iloa lelei e tamaiti e tatau lava ona latou afe i le faleoloa o le tamaloa o Semu, e faatau ai e le latou tina a latou panikeke e tailua a le tamaititi, ma se pepa aisa suamalie.

O nei gaioioiga uma a le fafine e iai lava mafuaaga e faia ai. Aua o le avanoa lea e saofafai ane ai Litia ma lana fanau i lalo o se tamaligi i autafa o le auala, ona latou aai lea ma si ana fanau, ma ia faatalanoa tamaiti i mea uma na tutupu i lo latou aso i le aoga.

O le auala lelei ma le faaleuo e faatalanoa ai e le fafine lana fanau, e pei o se mea fiafia lea i tamaiti lo latou talanoa mai i lo latou tina, ma faamatala uma i ai mea na tutupu i le aoga. Ma o le mea moni lava e le taitai musuā se tamaititi e faailoa i lo latou tina mea o loo popole ma fiafia ai i le aoga. O le sitepu lava foi lea e tasi sa laalaa mai ai le isi toatolu lea ua agai i le kolisi, ma o loo faapena ai lava ona mafanafana le faiā a lenei fafine ma lana fanau.

E oo ane i le taimi ua taunuu mai le fanau teine e toatolu i le fale, ua faamomoe le aulaiti, ae ua sauni foi e le fafine sina meaai māmā e tali ai si ana fanau lea o le a latou saofafai ifo nei i le laulau ma fai ai a latou tala mo lea aso.

O se vaaiga mataina lea i aso uma e fai ai e lenei tina ma lana fanau le latou masaniga lea, aua e pei lava o loo talanoa teineiti ma se isi a latou uo, ona e leai se mea e nana e se teineititi i lo latou tina.