O se galuega sa ta’ua e le tina, sa tele sona taua ma se aoga, ona o le manaomia tele o lea auaunaga e le toatele o le mamalu o le atunuu e autovaa atu.
O le gagana Peretania o se tasi o fili numera tasi i le mamalu o le atunuu, ma o le ala lea o le taua tele o le faatinoina o lea tiute, ma auauna ai mo tagata o le atunuu.
O se taimi foi sa iloa ai ma maua ai nisi manatu fou, ina ia agai loa e faatau ma amata se auaunaga faapea, talu ai sa ia mautinoa lava le manaomia tele, ma atonu e le na o totonu o le falemai, ae ua faaosofia manatu masalo e faapea foi se manaoga i totonu o fale faamasino ma isi nofoaga.
O le galuega faamatalaupu sa le faapito na o totonu o Middlemore, peitai sa faasalalau atu lea galuega taua i isi nofoaga. O totonu o auaunaga tumaoti mo tagata lautele, o totonu o nofoaga o tama ma tina matutua, o aoga, aemaise ai o le matagaluega o leoleo ma faamasinoga.
O le piriota lava lea e tasi i totonu o le 20 tausaga i le falemai, sa faatinoina ai foi ma le auaunaga, ma o loo faaauau pea seia oo mai lava i lenei vaitaimi.
A o faagasolo ai galuega faamatalaupu i soo se nofoaga sa taua, o le vaitaimi foi lea sa luitauina ai le tina ia Lupe, ina ia agai loa e faataunuu lea ituaiga tautua, ma pulea lava e ia lava.
O le tele o lona agavaa sa maua mai i le faafeagai ai pea ma faafitauli eseese sa faatoai ane i le tele o taimi ma taumafai e fesoasoani i ai.
1992 – 2010 (Founder of Manukau Pacific Island Trust)
Position – Service Manager
O le tausaga e 1992, na faavae ai loa le auaunaga ua faaigoaina o le Manukau Pacific Island Trust.
O se tautua sa amata ma faatuina ina ia faataunuu ai le moemitiga sa iai a o galue i galuega mo le falemai i Middlemore. O le isi autu tonu o lea tautua, ina ia mafai ona faaauau pea fesootaiga ma tagata lautele e manomia le fesoasoani.
O le va o ulugalii vevesi ma le misa soo, o sauaga i le va o matua ma fanau, o le isi ituaiga sauaga i le va o le tama ma fanau teine, atoa ai ma faafitauli i le va ma le tulafono.
O le tulai mai o le Manukau Pacific Island Trust, sa matua iloga lona fesoasoani mo le faaitiitia o faafitauli masani.
E le faapito mo tagata Samoa le auaunaga, aua e le na o Samoa foi e aliae ai faafitauli. Peitai sa tatala le avanoa mo soo se tagatanuu i totonu o Otara, Otahuhu ma le itumalo o Manukau.
O le tiute ma le galuega a Lupe mai lava i le uluai taimi sa tofia ai ma pule auauna mo le Manukau Pacific Island Trust, o loo oo mai lava i le aso o loo faaauau pea.
