E matuā faitioina e le susuga i le Fesoasoani ia Teofilo Iakopo, ia finagalo lē fiafia ma le lē mautonu o ekalesia e sefulu o le Matagaluega a Ueligitone o le Ekalesia Katoliko, e pei ona faaleoina e nisi ma lomia i le Samoa Times i le vaiaso talu ai.
O le mataupu lea o loo tuuaia ai se tasi o taitai o le ekalesia, le Aki-Epikopō, ona e faapea ua fai toatasi ma pulepuletutū ana faaiuga fai, ma ua lē tusa ai ma le faavae o le ekalesia aoao.
Na ta‘ua e le susuga ia Teofilo e faapea: “E lē faaluaina le pule a le Aki-Epikopō, e fai toatasi lava lana faaiuga. E pule lava ia i faaiuga e fai. Na pau lava le vaega a soo se tofiga i totonu o le ekalesia e i lalo ifo o le Aki-Epikopō e fai, o le faalogo ma usitai. E malamalama lelei ma manino le faavasegaina ma le faasologa o le galuega i totonu o le ekalesia. Soo se tagata lava e tatau ona malamalama i le faavae ma le galueaiga o le galuega”…Teofilo Iakopo (F.K.)
O se tasi o vaega o loo ta‘ua ai foi le lē malilie o le matagaluega Samoa, talu ai ona o le tofia o se tasi e tauavea galuega faatino, peitai e lē malamalama i fuafuaga ma faiga faa-Samoa, e masani ona agatonu ai le galuega. E lē gata i lea ae sa tuuaia foi le Aki-Epikopō i lona faia o tofiga ona alu lea nofonofo mai i Roma, ae tiai le galuega a o fia maua ai se feiloaiga e soalaupule ai le mataupu.
E iai ma isi tuuaiga o loo faatūtū agai i ai le finagalo tiga o le matagluega, peitai o le tele lava o ia vaega, ua o ni mataupu faalotoifale e fofō alamea ma toe teuteu ai. Sa taumafai foi le tatou nusipepa ina ia maua se fesootaiga ma nisi o sui mai ekalesia e lua e faapea, o loo tumau pea le lagolagoina o le faaiuga a le taitai.
Ae ui i lea e lei maua mai lava se tali mai nisi sa taumafai e fesootai i ai, ae peitai na feiloai atu i le susuga i le faafeagaiga ia Teofilo Iakopo. O se tasi foi ua leva ma e lē tau faailoina lana tautua i le ekalesia, i le tele o tausaga i Samoa, ae faapea foi Niu Sila nei.
O lea feiloaiga na maua ai se talanoaga manino ona o se tasi o taitai ua loa lona silafia i le galuega a le Atua aemaise o le Ekalesia Katoliko. Sa ia talia le galuega a le nusipepa o le taulogologo ma le faailoa o meatonu. O le ala foi lea na fesoasoani mai ai, ma ia ta‘ua ai le mea tonu ma le sa‘o e tatau ona taoto ai le mataupu i le va o le Aki-Epikopō ma aulotu e pei ona ta‘ua.
Na saunoa Teofilo, e ao ina malamalama ma manino lelei tagata lotu, ma soo se tofiga lava i totonu o le ekalesia i lana galuega, atoa ai ma le va ma ta‘ita‘i, aemaise ai o le pule ma le malosi o loo iai. Ua manatu ai le Samoa Times, o le a tuuina atu pea, ma o le a leai se upu, poo se fuaiupu e toesea, pe toe faaopoopoina i le tusi na saunia ma tuuina mai e le susuga ia Teofilo Iakopo, ina ia fesoasoani mai ai i le faafitauli o feagai ma le Matagaluega i Ueligitone.
O le a sasaa faaoti le uto a le faimea, ma tuu tasi le faiva o Pili e pei o le upu a le atunuu, auā le fesoasoani mai o le susuga i le alii Fesoasoani, ma le manatu maualuga o le a faamalieina ai lau faitau. O le finagalo lenei, ma le tusi na tuuina mai e le susuga ia Teofilo Iakopo o Manurewa.
