Talofa lava Samoa, malo le onosai, viia le Atua ona ua toe maua foi lenei vaiaaso fou e faaopopo i le soifua ma le ola. Ua api le uli, ma ua faapopo o ni aso ua, a ua le tuua aso folau i le malaga o lenei tausaga. Ua tatou tu lata foi i le faaiuga o le 2010, ae faamoemoe pea i le Atua e manuia ai lo tatou sa ma le folauga i masina mulimuli o totoe.
O le vaega lona lua lenei o le soifuia auauna o le tina ia Lupe Tofilau Eti Alesana-Vaofanua, ma o le faaiuga foi lea o lana fesoasoani mai i le tatou itulau masani.
Lupe Tofilau Eti Alesana-Vaofanua
E pei ona ta’ua i le vaega muamua o le talaaga o le tina ia Lupe, o le tausga e 1967 na tuua ai Samoa ae malaga mai mo Niu Sila.
O le va o Samoa ma Niu Sila, sa malaga mai i le vaa o le samo le Tofua. Sa iai le faamoemoe a taunuu mai i Fiti ona pue ai lea o le vaalele ma faaauau mai ai le malaga mo Niu Sila, e pei ona faia faapea i lena vaitaimi.
Peitai sa ese foi fuafuaga a le tina ma le aiga, sa manaia lava le malaga mai i le vaa o le sami, aua sa maua ai foi ma le avanoa e afea ai isi atunuu o le Pasefika, mo nai tafaoga pupuu, a o faagasolo mai ai le malaga. Sa ta’ua e le tina le le faigofie o lena vaitaimi i feoaiga i vaa o le sami, peitai sa onosai lava ona o le fia faataunuuina o manaoga mo le fia asiasi ma maimoa i le lalelei o atunuu o le vasa Pasefika.
Na muai afea Tutuila, ona sosoo ai lea ma Tonga i le motu o Vavau, o Niue, Fiti ma Vanuatu. Na taunuu i Niu Sila i le tausag lava lea e 1967. O le tausaga tonu foi lea na molimau le tina, na suia ai le pauni sa iai a Niu Sila, i le tala e pei ona oo mai i lenei vaitau.
Soifua galue/Galuega Niu Sila
Na amata le soifua galue o le tina i galuega i totonu o factory ma galuega leipa ina ua faatoa taunuu i Niu Sila.
O le taimi lava lea sa galue ai, ma fai foi nai aoaoga mo le afiafi, poo vasega afiafi pe a mae’a galuega e pei ona ta’ua i le vaega muamua o lona soifua.
E tele tausaga sa galue ai pea i galuega leipa i le tele o kamupani sa maua ai le avanoa, mulimuli ane o le fua mai o aoaoga faavaitaimi sa aoaoina ai i afiafi taitasi, sa suia ai loa ma le galuega ma tiute e auauna ai.
1979 – 1996
E 20 tausaga sa auauna ai i le falemai tele i Middlemore i le faatinoina o galuega faamaumauina o suafa ma faamatalaga e uiga i gasegase e agai atu i totonu o le maota gasegase.
O le agai pea i luma ma faatupulaia le tomai ma le agavaa i galuega faagasolo i totonu o le falemai, sa iu ina tofia ai ma fesoasoani mo galuega faamatalaupu.
