Malo le soifua manuia Samoa. Faamalo atu foi mo galuega atia‘e, ma faiva alofilima aemaise lava o le tapuaiga a tamā ma tina matutua i maota ma laoa. E fiafia lava e toe faafeiloai atu i le mamalu o le atunuu i ona muliauma eseese, ma le aufaitau. Talofa lava.
Ia alo maia o le vaega mulimuli lenei, ma le faaiuina o faamatalaga e uiga i le soifuaaga o le afioga ia Pepe e pei ona sa faagasolo mai ai i vaiaso e lua ua tuanai. Manatua foi o le uiga ma le autū o lenei itulau, o le amanaia lea o galuega lelei ma le tāua sa fitaituga ai le toatele o tamā ma tina o le atunuu.
O ni faataitaiga lelei ma le tāua mai i o latou foi vaitaimi, e avea ina ia luitauina ai, ina ia sooa aua ne‘i motusia le tafe mai o faamanuiaga sa latou mauaina, ma faatofutofusia ai foi lenei vaitaimi i le talutalufou ma tupulaga, ma le manatu maualuga o le a manuia ai pea le atunuu ma soo se tasi i le lumanai ma ielua.
Afioga Pepe Frances Isabella Moore
Sa e faitauina i le vaiaso talu ai, le tulaga o faailoga ma tusipasi, o agavaa ma tomai sa a‘oa‘oina ma faamanuiaina ai lea foi tina, mai a‘oa‘oga ma matata eseese sa auai ai a o iai i lea foi vaitau o lona soifuaga.
O le a sosoo atu pea, ma le tulaga o galuega sa galue ai e pei ona faailo atu muamua.
1955 – 1958: Shorthand Typist, Secretariat, Apia, Western Samoa & Hansard Writer, Western Samoa Parliament
O le uluai taimi foi lea sa ulufale ai i le galuega i totonu o le malo, ma sa amata faigaluega ai lava o se vaega o le sailia ma le faamautuina o agavaa ma le tomai mo galuega, seia oo lava ina filifilia ma tofia aloaia e tauavea le galuega.
1958 – 1959: Secretary/Clerk, AM MacDonald & Co Ltd Apia, Western Samoa
O le vaitaimi foi lava lea sa iai pea i lalo o le malo o Niu Sila, le faatinoina o galuega e pei ona ta‘ua i luga.
1959 – 1962: Shorthand Typist, State Advances Corporation, Wellington and Palmerston North NZ
E lē gata sa galue, ae o se vaega o le faalauteleina o le malamalama ma le tomai i lea lava ituaiga galuega i Niu Sila e pei ona silasila i ai.
