Faamanuia le uluai tausaga o Kingston Fialei Mariner

O Kingston Fialei Mariner o se alo faasino poo le atalii o le susuga i le alii Pule o le Leon Autos Ltd, le susuga ia Fiaalii Mariner ma le faletua ia Alei Mariner.
O le Aso Toonai, aso 26 Mati, 2011, na atoa ai le tasi le tausaga o le alii o Kingston Fialei Mariner. O se atalii fiafia ma le ola maloloina i lona tuputupu a‘e.
Sa matuā faatumulia ai totonu o le kamupani a le Leon Autos, i aiga, uo ma ē masani e molimauina le faamanatuina o le uluai tausaga o le atalii. E lei tuumāmāina foi le taumafa latou ma nai faafiafiaga o le aso.
O le tala mālie, o le aso fanau o Kingston sa tuu e fai lava i lona maota i Otara, peitai ona o uiga o le tau, na laga ai se manatu o le alii Pule o le Leon Autos, o le tamā foi lea o Kingston, o le a fai lava i totonu o lana kamupani i Otara i se tasi o vaega tele o lona faleinisinia.
O le lagona o le alii Pule, ia faamanatu faatasi ai le asofanau o le atalii ma le avea ai o ia ma faauluuluga fou o le Leon Autos Body Repairs Co Ltd, lea ua suia nei le igoa ia Kingston Autos Ltd i Otara.
Ia manuia tele le faamanatuina o le uluai tausaga o le atalii ia Kingston Fialei Mariner, aemaise o le tautua fou a le Kingston Autos Ltd lea na faamanatuina faatasi i le Aso toonai na se‘i mavae nei.