O le vaitau lenei ua ta‘ua o le vaitau o le Faamati – ua faaigoaina i le Masina ua atofa e le Ekalesia Faapotopotoga Kerisiano Samoa faapea le Ekalesia Metotisi ina ia toe faaleleia ai Maota o Galuega.
O le taimi lenei e potopoto uma ai Mafutaga a Tina, ua vaavaai i nisi o vaega o le Maota o le Galuega o loo faamautu ai le faafeagaiga ma lona faletua ma le aiga, ona saili lea o soo se vaega o le maota e moomia le toe faaleleia.
O le tulaga ua iai nei ua faapea foi ona fai mea faalogo i le Faletua o le Tiakono Toeaina mo meafale poo ā lava vaega o nei galuega e tatau ona ave i ai le faamuamua.
O vaega ia o le Faamati ua ta‘ua o Mea asiasi togia. O le Matagaluega a Aana ua aofia ai Pulega a Falelatai, Aiga i le Tai, o le Atu Aana faapea le Itumalo o Lefaga.
O le Afioga i le Sui o le Fono a Sui Tofia, o ia lea o le Tiakono Toeaina a lea Matagaluega, le Afioga Tuimalealiifano Sualauvi Vaaleto‘a II. O lana Masiofo le Afioga foi lea i le faletua o le Tiakono Toeaina, o Faamausili Leinafo Tuimalealiifano, na ia faataatia meaasiasi togia o lenei tausaga.
Mo le afioaga o Safaatoa-uta i lana EFKS – o nofoa o le Maota o le Galuega, o Laulau, o le masini tamea atoa ai meaasiasi masani, e pei o ipu faapea fala mo le maota o le Faafeagaiga. O mea asiasi ia na molimauina. O le tulaga foi lea na iai le tele o aulotu i lea lava Matagaluega.
O nisi o saoga mea mo lea faamoemoe e aofia ai tuulaufala e 45, papalaufala e 48 ma le faaoloaina o le maota o le faafeagaiga i le itu tau ipu. Faaalia e Taua Simanu, le Faletua o le susuga i le Faafeagaiga o Safaatoa-uta, e eseese lava mea togia mo matagaluega taitasi mo tausaga uma.
“E lei talanoaina ma fuafua se suiga mo le faiga o le faamati, ae o loo faia pea i tausaga uma ma mulimulitai i saoga mea e fuafua mai i le isi tausaga mo le isi tausaga, ma e faalagolago lava i le fautuaga mai i le Tiakono toeaina.
Na ia ta‘ua foi, o le itu tau i tuulaufala, o matagaluega tetele e tatau ona 100, o matagaluega feololo e ta‘i 60 ma matagaluega laiti e ta‘i 40. “E lagona lava le fiafia ona ua faataunuuina lea faamoemoe ma o loo lelei lava le alafua o loo fua i ai le faiga o faamati mo tausaga uma”, o se saunoaga lea a le faletua ia Taua. Na ia faafetaia foi la latou matagaluega ona o se taimi muamua lea ua iai se masini tamea mo lo latou aiga.
Ua tele finagalo faaalia i le talafeagai ona faaauau nei ituaiga asiasiga ona o le vaavaai foi i le taumafai e atina‘e o aiga taitasi. Peitai o le toatele lava i afioaga eseese o loo finauina le tumau ona faatino o lenei asiasiga faaletausaga.
E tāua ona o le tiute lea o aulotu o le faamatagofie o maota o le Galuega, o se nofoaga ua ta‘ua lava o le maota o le Galuega ma o le Aulotu latou te faaleleia. O faaaloaloga na faaiu i ai le mafutaga lenei e pei ona taulai i le Tiakono Toeaina faapea ai lona faletua.
O le faamoemoe ina ia mafai ona faaaogā le maau o Mafutaga a Tina i le nofoaga o loo tele ina potopoto ai foi aulotu i vaiaso taitasi seia aulia le tausaga fou i asiasiga ua faataatia mo lenei atina‘e a ekalesia.
O le Matagaluega a Apia Sasa‘e o le latou meaasiasi togia o le ta‘i $2,000 i le $3,000 (tala Samoa) o le tinoitupe lea ua tuu sa‘o lava i le lima o le Faafeagaiga ma lona Faletua ina ia mafai ai ona faatau ni o la laei. O loo aofia i lea tinoitupe mea asiasi masani o fala faapea ai ma ipu auā le faatotogaina o maota o galuega.
Na faatalatalanoa foi le toatele o le mamalu o le atunuu i le talafatai o Apia e faatatau i lenei faiga ua masani ai aulotu i tausaga taitasi. Mai i le to‘a 20 o tagata na faatalatalanoa a o feoai i le taulaga, e leai ma se isi e lei manatu e tāua ona o le galuega lea mo le faaleleia o le galuega tala‘i ua feagai ma faafeagaiga ma o latou faletua.
O se auala foi lea na ta‘ua e le toatele, e fai sao atu ai le Aulotu i nei maota auā e lē o ni fale tumau o faafeagaiga ma lona aiga. O le vaiaso lenei ua faagasolo ai le faamati a le Ekalesia Metotisi i Samoa.
