Faatalofa atu i si a tatou au faitau! Malo lava le soifua, malo foi le folau mai le la la tausaga ua tuanai atu, ma e manatu sa outou maua ni faiga malologa fiafia i le faaiuga o le 2008. E ui foi ina ufitia nisi aiga i le faanoanoa i lenei vaitau ona o mafutaga motusia i le pule a le oti, ona o nisi o faalavelave faafuasei poo ni gasegase foi, ae tatou mapu atu ia i aao faamafanafana o lo tatou Matai sili e faamafanafanaina i tatou i nei taimi o le faavauvau.
Mo le toe faaauauina o le tatou fagogo, alo maia o le sosooga lenei. Na ta mai le logo o le piliota e sosoo ai, ona agai lea o Pula i lana vasega, lea e iai ma le tamaitai o Pina i le mataupu o le faasaienisi. Na iloa lelei mai e Pina foliga fiafia o le alii faiaoga, ma ua ese lea mai foliga ia sa iai i le taimi atoa na ave ai e Pina le tusi mai ia Luama i le alii.
Sa iloa mai foi e Pina le tu o Pula i le telefoni a le aoga ma talanoa, aua e fesagai tonu le potu sa fai ai le piliota lea faatoa uma a Pina, ma le itu o loo iai le telefoni a le aoga. Ua mate nei Pina, se aso o Luama lea na talanoa i ai Pula, fua o lea ua faafuasei ona toe ola mai foliga o le alii, ma e oo foi i le amataga o le latou piliota i lea taimi, ua matua fiafia lava ma faitala malie le alii e pei o se taulealea ua mimita ua maua sana teine palagi.
Ua fai sina fou o uiga o Pula i lea piliota. Ua lelei faasolo atoa uma tamaiti i le taliina o fesili o le mataupu. Na ona ta lava o le logo ua uma le piliota ua gasolo tamaiti i fafo mai le potu, ae faapea atu loa Pula ia Pina lea ua oo tonu ane i ona luma, ‘Pina, faatali mai foi.’ Ua faatautu Pina, ‘E a e iai se mea manaia ua e fiafia ai?’ Ua ata faamanaia Pula, ‘se talosia ia oso le mea lea e tau fuafua atu i ai. Sa ou talanoa i le telefoni ia Luama analeila, aua o lea e tau lau alu e tafao ma fai se ma tala ma lona tama taeao i le afiafi pe a manava galuega, ae na ma talanoa la fai mai Luama o la foi e tau lana alu i tua. E a, tau te le o ma e alu atu ai foi oe e asi nai ou matua?’
Ua mafaufau Pina ona faapea atu lea, “Ae o le a se tala a Luama, lona uiga o loo tuu e te lua o faatasi ma Luama i lona aiga?” “Se leai, e lei maua se tonu o le mea lena. Ae na ou ofa ia Luama e mafai ona ou alu atu piki oulua tatou o faatasi, ma le toe tau o mai foi o ona matua. O lea e tuu sei uma ou vili lea i le toeaina o Talivai pe fetaui ma laua lea tonu. Ae foliga la e fiafia i ai Luama pe a ioe mai lona tama.”
E le talitonu Pina i se tala e tasi a Pula lea e fai mai, ona o lea na te iloa e le o toe fia latalata lava Luama i autafa o Pula. Pau le mea ua tu mai nei i ona luma, o le manaia o si avanoa e toe vave oo atu ai ma ia i tua sei asi nai ona matua ma nai ona tei, aemaise e tatau lava ona alu e toatolu ai le latou malaga, ina ia aua nei o toalua na o le vaega lea i lenei mea mamao. “Ia manaia foi si na tonu, ae sei vaai la pe ioe i ai le faifeau.” E faauma atu lava tala a Pina ma laa i fafo mai le potu aoga, ae liliu loa Pula ma agai i le itu o iai le telefoni a le aoga.
