Ae toe lagona atu loa le isi ana tala, “Ia ua lelei, ia leai se mea e leaga ai, faitalia la au ma avatu laua taeao. … ia ua lelei, … leai, e tatau lava ona matou oo atu iina e lei taina le ono poo luma mai foi. … E te finagalo la ou te logoina teine, pe lua te vili mai i ai?…. Ia aua e te lua popole faitalia au ma avatu taeao. Ae faafetai lava mo le talanoaga, alofa tele atu i le tina o le galuega. Soifua ia.”
Na tuu i lalo le telefoni a Pula, ma na vaaia e Pina ua moeiini mata o le alii aoao ma mapuea fiafia, ua pa tonu le mea na manao ai. Ua liliu nei Pina ma faatopetope i le itu sa tatau ona agai i ai mo lana piliota, manu e lei iloa mai o ia e Pula. Ua tuua le aoga, ma e oo atu Pina i le fale ma lana tala ia Luama e uiga i le telefoni a Pula, ae o lea ua saofai mai Luama i le fale ma lana ia foi tala, ae iai faatasi ma foliga le mautonu o le teine, pe faamata o se tonu lelei lea ua fai pe leai.
“E Luama, na vili mai le isi tagata ia oe analeila?” “Ae a foi la lea e te sau nei ua le lelei lava sau feau e fai; ua leva ona ou faatali atu sei e sau e fai mai sau tala. Pei a ua toe sese lava lau tala ua fai ia Pula.” Ua savavali nei le au tamaitai i le la potu, ua saofafai i o la moega ma taufai tilotilo le isi i le tasi, aua o lea ua malamalama uma i le mea lea ua tupu.
Ona muamua loa lea faamatala e Luama lana malaga i Apia, le la faamavaega ma si alii loia o Onosai, seia oo ina taunuu mai i le fale, ae poia faamanu i ofaga ai loa i le telefoni a Pula.
Na o le faalologo o Pina ma uu le gutu i le tele o le lavelave lea na asa e lana teine i si nei taimi puupuu o le aso. Ua mapu ifo Luama, ona sosoo loa lea o si vaega a Pina latou, aemaise lava le faamatalaina o le telefoni na fai mulimuli nei i le tama o Luama. “Ae ua ou le maua lelei la le faaiuga o a la tala ma lou tama, poo ai o ia ma ou matua e toe vili mai ia te oe e logo mai i ai le tonu mo taeao,” o le toe sosoo atu lea a Pina.
