E le iloa e Pula na toe taotaotua mai lava Pina i lana agai atu i le telefoni, ae na sau gata i tua o le isi pou tele o le hallway, faagatasi ai loa iina ma faataga faitau lana api, ae amata ona falo mai ana satelite i le telefoni lea ua fai. “Talofa, faamolemole lava pe mafai ona ou talanoa atu i le tama o le galuega? … O Pula Filemoni lea e tautala.” Ua atili ai ona tatoso faauumi i fafo satelite a Pina, ona e sao lava, o lea ua vili Pula i matua o Luama.
E foliga ua taunuu ane le toeaina i le telefoni. “Talofa lava, lau susuga i le ao o faalupega. E a, o a mai le aiga i lenei aso?… Ia o lea foi e malosi lenei atalii, ma manuia le galuega. Ua ou toe valaau atu pe o talafeagai lava ma oulua le tatou tuugatala mo taeao? … E moni?, ia faafetai lava; o lea foi ua fiafia e maua ai se avanoa sei tatou tafafao ma talanoa ua leva aso e lei toe asiasi atu i si lua aiga iina.”
Ua mafaufau Pina, e ese le poto o Pula e teuteu muamua lona auala, aua o lea lava e lei tauina le auga tonu o le telefoni lea e fai. “E a, ua a mai le tapenaga o le malaga si teine o Luama mo Niu Sila, pe ua iloa se aso e alu ai?… Oi e a ea? Tai manaia la o lena ua mautinoa uma ana mea….Oi o lena e tau sana alu atu taeao ia oulua?… Ia o oulua lava, pe te lua mananao mau te o atu faatasi pe a tuua le aoga, aua atonu e mananao foi e o atu uma ma si ana uo lea, le tamaitai o Pina.”
Ua matua faaatoatoa le faalogo a Pina poo le a se tali mai a Talivai o loo i le isi itu o le laina. Ua tau falolo laititi atu i fafo le ulu o Pina sei vaai i foliga o Pula, ae le o mafai ona iloa lelei atu ona o loo tele ina u mai le patua. Pe atoa lava se minute o vaaia e Pina o loo tu Pula ma faalologo i le telefoni, ae na o le luelue o le ulu, e foliga o loo fai mai i ai se lauga a le faifeau.
