E muamua ona faafeiloai atu i le paia ma le mamalu o Samoa i soo se vaega o le lalolagi. Malo le soifua maua ma le lagi e mama.
Avea foi lenei avanoa e molimoli atu ai faamanuiaga o le tausaga fou i aiga uma lava ma le talitonuga, o le a avea amataga o lenei tausaga o se taimi e toe timata ai le upega ma toe tapenaina le ola ma le soifua aua tiute fai, o valaauina aemaise o faiva alofi ua totofi ai i tatou e le Atua tatou te auauna ai ia te Ia aemaise o uso a tagata.
O le vaitau lava lenei o le tausaga e masani ai ona tatou manatu ia toe afua se taeao fou. E iai le lagona e manao ia iai ni suiga lelei atoa ai ma le naunautaiga ina ia alualu i luma le soifua manuia e le gata i le tamaoaiga, o galuega, o le ola maloloina ae faapea nisi o vaega o loo iai le manatu ina ia ausia i lenei tausaga. O se itu lelei tele lea mo le soifuaga aua e iai le talitonuga e le tatau ona tumau ai pea i le mea e tasi.
E tatau ona iai se siitaga i le isi laasaga. A tumau lava i le mea e tasi ona faapea ai lava lea ona ola ai pea i lea alafua e tasi, o mea foi e maua o mea lava ia na maua i le tausaga ua tea. Peitai a oo ina tatou laasia se tasi o vaega, o le a sui foi mea e aoaoina ma mea e maua. O le suia o manatu o le a iai foi luitau aua e ese le laasaga ua iai nei.
Talosia i lenei amataga o iai se fuafuaga ma se tapenaga ina ia siitia e le gata i le soifuaga nei ae faapea foi le ola faaleagaga. Afai e iai se suiga i le ola faaleagaga aua le ola mafuta i le Atua, o le a faapea foi ona e alualu lou fiafia i le Atua ma lou faatuatua ia te ia i taimi uma ma aso uma aemaise taimi e fetaiai ai ma faigata.
O nisi nei o vaega e ono mafai ona e avea ma suiga mo lenei tausaga ina ia faatupuina le ola faatuatua:
1. Faitau le Tusi Paia mai le Kenese e tau i le Faaaliga i le 2009.
2. Taumafai e aua nei misi se lotu i Aso Sa uma o lenei tausaga.
3. Faaavanoa le 5-10 minute i taeao uma e tatalo ai ma tuuina atu ai i le Atua lou aso.
4. Saili se vaega o le ekalesia e te auauna ai. Aua le faatali sei filifilia oe pe fai se palota.
5. Foai i le Atua e ala i taulaga poo sefuluai ma le loto malie.
6. Saili avanoa e mafai ai ona e auauna ai i isi e aunoa ma se totogi. E tele avanoa e pei o falemai o tagata matutua, o faalapotopotoga tumaoti, o aoga, o polokalame mo talavou etc….
7. Anapogi tasi i le masina.
8. Tatalo mo isi aemaise i latou e le lelei le tou mafutaga.
9. Vaai poo ai se tupulaga talavou e mafai ona e fesoasoani i ai.
10. Tautala i luma o tagata e uiga i le Atua. Faailoa lou faatuatua.
Ia fesoasoani mai le Atua i lenei tausaga i au fuafuaga aemaise o tapenaga mo se olaga suia i le 2009.
E maea le tausaga 2008 o tatou talatalanoa i le Tusi o Faaaliga. E tele ni aoaoga o loo mafai ona faaalia ai le alofa o le Atua i ona tagata atoa ai ma le taumafai a le Tiapolo e faaleaga le palealii o galuega a le Silisili Ese.
Na gata mai le tatou talanoaga i le faamatalaina o le Malumalu i Ierusalema ma le Anetikeriso e pei ona aoaoina e Keriso i le Mataio 24. E ui o se vaega tutotonu o le talitonuga faaiutaia peitai ua puleaina nei e le talitonuga Mosalemi e oo mai i le aso.
O le tulai mai foi o le Anetikeriso o le manatu o le toatele, o ia e maua ai le filemu i le lalolagi. E pei ona tatou talanoaina le fitu tausaga o le sainia ai e le Anetikeriso se maliliega o le filemu i le lalolagi faatasi ai ma tagata Iutaia.
I le ogatotonu o lenei fitu tausaga o le a ia toe faaleaogaina ai lenei maliliega ma ia ave faamalosia ai le malumalu i Ierusalema ma ia faamalosia tagata ina ia tapuai atu ia te ia.
O Keriso na ia lapataia lona au soo ma i tatou uma ina ia ‘sosola i mauga pe a outou iloa le mea e inosia e faatafunaina ai e pei ona folafola mai e le perofeta o Tanielu ua tu i le mea paia.’ (Mataio 24:15) O loo talanoa Keriso i le Anetikeriso, ma le mea e paia o le malumalu lea i Ierusalema.
O Paulo na ia lapataia foi le Ekalesia i Tesalonia i lenei lava mea. “Aua nei faasese se tasi ia te outou i se togafiti e tasi, aua e le oo mai lena aso, seia muai ona taunuu o le tetea ese ma ia faaalia mai o le tagata o le amio leaga o le tagata lea o le malaia, o le tetee atu ma faamaualugaina e ia o ia e sili i mea uma lava ua tauatuaina ma mea uma ua ifo i ai tagata o lea ua tietie ai o ia i le malumalu o le Atua o loo faaali mai o ia, o le Atua lava o ia”. (2 Tesalonia 2:3-4).
Ua fetalai le Tusi Paia e iai le malumalu i Ierusalema i ona aso e gata ai ina ia faataunuuina mea uma e pei ona folafolaina.
O le Anetikeriso lenei o se tagata foliga mai e lelei peitai ane o le taimi e ulutinoina ai o ia e le agaga o le Tiapolo, ona suia ai lea o ia mai se tagata lelei i se tagata e pei o Hitila, o le ia taumafai ina ia fasiotia uma tagata Iutaia atoa ai ma i latou e talitonu i le Atua.
O se vaega taua lenei o le vaitau o le soifuaga o le lalolagi ua faaigoaina o aso e gata ai. O le vaega mulimuli o fuafuaga a le Atua ma le taumafai a le Tiapolo ina ia puleaina le lalolagi.
O se aotelega lenei o mea o le a tutupu ina ia manino:
1. O le a oo le lalolagi i tulaga faigata e pei ona valoaia e Keriso i le Mataio 24. O le a faateteleina taua, o mafuie ma tulaga faapena i le lalolagi.
2. O le a faigata le tamaoaiga ma taugata le soifuaga.
3. O le a vatau foi atunuu.
4. O le a leai se filemu e maua.
5. Ona tulai mai lea o le tagata ua igoa o le Anetikeriso ma se fuafuaga e maua ai le filemu. O lenei fuafuaga o le a sainia lea i le va o ia ma isi atunuu e pei ona valoia e Tanielu mo le fitu tausaga. O lenei fuafuaga o le a faamalieina ai le toatele o tagata ma faapea ifo, ‘ia tatou mulimuli i lenei tagata aua o ia o se tagata lelei ua tatou maua ai le filemu’. O se lagona lelei peitai e le o silafia e le toatele, i le ogatotonu o le fitu tausaga e toe sui ai le mafaufau o lenei tagata ma ia faaoo ai le maliu ma le oti i le toatele.
6. O le a faapea ona tulai lenei tagata i le malumalu ina ia tapuai uma atu ai tagata ia te ia. Silasila i le Tanielu 9:27; 2 Tesalonia 2:3-4.
7. O se tasi vaega autu pe e taua ai lenei malumalu ona e pei ona valoia, e taunuu mai i ai Keriso i lona toe afio mai. (Malaki 3:1).
O se vaitau e ese le taua lenei o loo tatou soifua ma ola ai. A tatou vaavaai i le suiga o mea o tutupu e fai lava si saoasaoa. O loo le mapu lava le vatau o atunuu i totonu o Palesitina i le taimi nei. O loo finau pea i eleele ma fanua aemaise le nofoaga tonu o le malumalu e pei ona taua ona ua avea nei ma nofoaga autu o le talitonuga Mosalemi.
Ua faataapeapeina Iutaia i le lalolagi atoa aemaise lava i le vaitaimi i Hitila. I nei onapo ua amata ona toe gasolosolo tagata Iutaia mai atunuu uma o le lalolagi e toe nonofo i eleele o Iutaia ma o se tasi lena o vaega o loo iai le vevesi i le taimi nei i eleele o Iutaia.
O aso taitasi e potopoto ai tagata Iutaia e tatalo i le nofoaga tonu sa iai le malumalu o Solomona. O loo totoe ai se tasi o vaega o le pa o le malumalu lea o loo faaigoaina nei e tagata o le Wailing Walls pe a silasila i ai i taimi o tala mai nuu mamao i le TV. Ua avea o se nofoaga paia lenei pa ona e faia ai tapuaiga i aso uma.
O le a toe foi le tatou talanoaga i le mataupu e 11 o le Faaaliga, o loo faaulutalaina faapea ‘Ua vavalo mai molimau e toalua’, ina ia mafai ona toe sosoo mai le tatou suesuega mai le tausaga ua tea.
E tele lava manatu ma taofi eseese o i latou e aoaoina le Tusi o Faaaliga e uiga i nei molimau e toalua.
I le Feagaiga Tuai o loo iai se valoaga ia i laua o le a avea ma e tomuaina pe sauniaina tagata aua le afio mai o le Mesia. Muamua o le perofeta o Elia e pei ona valoaia e le perofeta o Malaki. (4:5-6). O le tasi tagata e pei ona fetalai ai le Tusi Paia, o Ioane lea le Papatiso. O ia lea na valoia e le perofeta o Isaia ‘o le leo o loo alaga i le vao’ ina ia teuteuina loto o tagata e tapena ai i le afio mai o le Mesia. (Isaia 40:3).
O le manatu taatele e faapea o molimau e toalua o loo taua, o Elia lava ma Ioane ona o nei le itu: O i laua nei na tapenaina le afio muamua mai o Keriso. O i laua foi nei o le a toe faaauauina le faiva e tasi aua le afio faalua mai o Keriso.
I le 11:3 o loo taua ai e faapea “Ou te tuuina atu foi i au molimau e toalua la te vavalo ai i aso e tasi le afe e lua selau ma le onogafulu…”
O molimau nei e toalua o tagata o le a tautalaina atu le afioga a le Atua. O le uiga o le upu ‘perofeta’ o le faailoa atu lea o le finagalo o le Atua. Fai mai le Tusi Paia o le umi e molimau ai i laua e tasi le afe lua selau ma le ono aso.
A vaevae aso nei i tausaga ona maua lea o le tolu ma le afa tausaga. O Molimau nei na faatoa tuuina mai i le taimi ina ua faaleaogaina e le Anetikeriso le feagaiaga mo le fitu tausaga i le ogatotonu, ina ua maea le tolu ma le afa tausaga muamua. O aso o totoe o le feagaiga e tolu ma le afa tausaga lea o le a auina mai ai molimau mo le la galuega o le perofetaina poo le faailoa atu o le finagalo o le Atua.
Talosia e te le oo i lea taimi ae ua ave olaina uma i tatou i le siitiaga i le ea e pei ona faamalamalamaina e Paulo i le ekalesia i Tesalonia. (1 Tesa 4:13).
E le o se taimi faigofie lea taimi i le lalolagi atoa. E le gata o mala ma mea faigata o le a oo mai e pei ona tatou suesue i ai, ae o le le mautonu ma le femoumouai o le soifuaga atoa ai ma le faamatau mai a le Tiapolo ma ana au o temoni i le lalolagi atoa.
O le tulaga lena e taua ai e pei ona valuvalusia aa o le fau i lou finagalo, talia nei Keriso manu o maua lou avanoa. Talia nei o ia o lou Faaola. O ia o le Ala, Upu Moni, ma le Ola. E pei ona ia fetalai: “E le alu atu lava se tasi i le Tama pe a le ui mai ia te au”.
Tatou te le iloa le taimi ma le itu aso, peitai a oo mai le polokalame a le Atua ae ua tatou sauni. Ua mautinoa o tatou o tagata o le lagi aua ua uma ona tatou talia Keriso e avea ma o tatou Faaola.
Ia faamanuia le Atua ia te oe i lenei vaiaso
Lui Ponifasio
Pastors