Radio Samoa: Ou te talitonu o nisi atunuu mamao, o le latou faiga palota, a mae‘a e leai ni tulaga faapea o ni faamasinoga, ae na o tatou lava.
O iai se manatu ma se finagalo o lau afioga i le alu i luma o le malo, pe tapu ia lea tulaga, ae o sasa‘o ai e pei ona finagalo ai le malo ma tulaga faapea o le palota?
Palemia: Ioe, o analeila lea ua taoto ai se pepa i totonu e fai i ai faaiuga i le vaiaso fou, e faatu ai se komisi suesue e toe tilotilo i toe teuteuga o le tulafono, pe iai ni mea faapena e mafai ona fai i le tulafono. Ae o le isi mea lea e maoae tele i Samoa nei.
Ua e iloa foi, e iai a upu a isi papalagi, fai mai o le Samoa, e fanau mai a faipule loa. O le Samoa la, na polokiki mai a o la e pepe seia oo a ina tuu i le lua, o la e polokiki.
O le tulaga la lena e ono faigata ai ona e polokiki tele le tatou atunuu, ae fanau mai le agaga foi lea faatulafale, e tiga ona lē lelei le lauga, ae finau a i le lauga. E lē tāua le poto e lauga, ae tāua le palaai o le isi e tu i le tootoo.
O le ituaiga maelega lava lena ma le sogasogā o lea e oo a i faigapalota, o loo faaalia ai lava uiga ia, ae faaigoa e isi i le upu lea, o le saili malo. E lē se saili malo le mea lea, o le saili matagā ma le sāili luma.
Radio Samoa: O ā ni tulaga ua iai se finagalo o le malo, aemaise foi lau afioga i le taitai, i ni tulaga e puipuia mai ai lo tatou atunuu i suiga ogaoga o le tau?
Palemia: O le matuā tele o fuafuaga ia ua uma ona faataotooto ma faagasolo. Manatua foi o le suiga o le tau lea e faapea, e tatau ona oo i le taunuuga faatino mea uma i le ooooga poo le tausaga e 2050. Lea la tatou te iai i le 2011, toe 40 tausaga.
A o lei oo atu la i le 40 tausaga, e tele a mea e tatau ona fai i le taimi nei, tai pei o le fausia o taligalu e taofiofi ai le vave ‘āia o le gataifale, o faga oneone, ma taofiofi ai le vave mai o le galu i alatetele o le malo.
Ua leva ona faagasolo a tatou polokalame o le fausia mo auala galue mo tatou tagata i uta, i mea o loo tu maualuga, o eleele tu maualuga, ma o le tele o auala nei ua uma ona faatā.
O le atina‘e pito tāua a lena, o le faatino o auala ia i uta, toso i ai ma le eletise, telefoni ma le vai i eleele maualuluga.
Lea la ua sola ese tatou mai le tulata i le sami, mai le aafia i ni galulolo poo ni afā, ae o lea ua see i eleele maualuluga, ia e mafai a la ona aafia loa i afā, aemaise a o lea ua tu maualuga ua lavea gofie, auā o le malosi o le matagi e peiseai e matuā lagonaina e tagata i uta i mea maualulua. Lona uiga la, a fau o tatou fale i uta, e tatau ona siisii i luga le tulaga o le malosi o le fausaga o le atufalega.
Ma e tatau foi ona tilotilo i le toe faataotolia o auala, ina ia aloalo ese mai ma eleele tumatafaga o le mafola. O le isi vaega tele a, o le tatou tilotilo i le tulaga o le faaleleia atili o a tatou gaioioiga mo le vave ona o i uta tagata i le taimi e maua mai ai faaaliga o ni afā ma ni galulolo o le a sau.
E oo foi la i le tele o nuu, lea ua amata ona fausia i tuafale auala i tulaga maualuluga e vave ona agai i ai tagata, auā o le tele a o sunami, e lava a le taimi; 5 i le 10 minute, e matuā lava a le taimi e te tapena ai ma e tamoe loa i uta.
E lē gata foi la i lena, ae o lea foi e sailiili tatou i auala eseese mo le gaosia o le eletise mai le ituaiga o eletise e maua pea i Samoa nei mea e gaosi ai.
E tai pei o le eletise e maua mai le vai, eletise e maua mai le lā, eletise e maua mai le malosi o le matagi, eletise e maua mai le malosi o le āu.
O mea uma a lena o lea ua uma ona faaaogā ma faatino e atunuu papalagī.
O tatou a la, o le mea pito sili ona taugofie, o le vai ma le lā. O lea foi la ua iai a tatou faataitaiga, o lea ua mu atoa Vailima i le moli e ola mai i le lā, a o lea foi ua faatū le kamupani, ua amata a latou gaioiga mo le gaosia o le 2.5 kilouati, fua i le malosi tau eletise o le a gaosia mai ai.
Ma a mae‘a loa ona faatino le ituaiga o eletise lea, ona avea loa lea o Samoa o se atunuu pito sili ona telē le eletise o loo ia gaosi mai le lā i le tatou itulagi.
E lē gata la i lena, ae o le liliu foi o le malo e tōtō fanua i laau, ina ia fesoasoani ai.
Manatua foi o le tele o laau e ola, latou te puaina mai i fafo le okesene, ae mitiia le kaponi o loo mafua ai ona vevela le ea ma vevela le lalolagi. O nisi na o mataupu e pei ona e fesili mai ai i gaioiga o loo faatino e le tatou malo e tali atu ai i le fesuiaiga o le tau.
