O le vaiaso na tea nei sa ou i le fale o le Faamasinoga Sili o Samoa (Supreme Court) e fesoasoani i se aiga i le latou mataupu tau eleele. O lea eleele e latalata i le taulaga ma o eleele tuusaoloto (freehold land).
O le eleele o loo o‘u fesoasoani ai, o se eleele e telē lona tau ona e latalata i totonu o le taulaga i Apia ma e latalata i le mea o loo fai ai pisisnisi i Apia.
E lei uma lenei mataupu o loo faaauau pea. Na iu ni finauga a a‘u nei ma le isi loia i luma o le Faamasino Sili, i le faatonuina o loia e toe faila atu ni pepa i le faaiuga o le masina e tau faamanino ai lenei mataupu, ua lavelave tele.
E ese le tāua o lenei mataupu. O la‘u finau ou te finau i luga o le eseesega o upu faasamoa nei.
(1) vaelua
(2) vaelua tutusa
O le galuega a faamasino i fale faamasino ma loia, o le vaai lea i tulafono pasia a le malo ma faauiga ia upu o tusia i le tulafono, i se mataupu o finauina. E pei e faigofie pe a tusia, ae o le mea sa‘o, afai e lē lelei le loia i le vaai i uiga o upu o tusia i se mataupu o finauina, e iu ane, ua leai ni fanua o aiga, ae ua alu tupe e totogi ai galuega faaloia. Ia mataala ia outou mataupu!
O le fanua lenei sa ou alu ai i Samoa i le faamasinoga, o le fanua na amata mai i taimi o Siamani. Sa faatau ai e se aiga lea fanua e latalata i Apia.
Sa fai ni faaiuga se tolu i ni tausaga ua mavae, ua afaina tele ai le aiga lea ou te tu ai.
Faaiuga Numera 1:
O se faauiga muamua i le 1980, sa fai ai se faatonuga a se Komesina sa aiaiaina se finauga i lenei fanua, (1) o le fanua o le fanua tuusaoloto (freehold land). (2) o tagata e ona le aiā i le tulafono i lenei fanua o fanau a tagata e toalua, sa nonofo ai i le fanua, ae ua maliliu.
E leai se faaiuga a le komesina e vaelua tutusa le fanua.
Faaiuga Numera 2:
Sa fai se faaiuga a le Faamasinoga Sili o Samoa (Supreme Court) e vaelua le fanua, ae leai se faaiuga a le Faamasinoga Sili e vaelua tutusa le fanua. O le faaiuga lenei i le 1999.
Faaiuga Numera 3:
Sa fai se faaiuga a le Faamasinoga Sili o Samoa (Supreme Court) ina ua toe ave foi lenei mataupu i le Faamasinoga Sili ona e lei vaeluaina le fanua e pei ona faatonuina i le 1999. Sa toe faatonu e le Faamasinoga i le 2003 e vaelua le fanua ae leai se faatonuga e vaelua tutusa lenei fanua.
O A‘u Suesuega i le Tulafono ae ou te lei Tu i Luma o le Faamasinoga i le Vaiaso na Tea:
• Sa ou maua ai ni tusi a ofisa e lua o le malo o Samoa, ua tusia ai faaupuga e faapea o le fanua e vaeluaina tutusa. O fea na aumai ai lenei faaiuga e vaelua tutusa le fanua? A vaelua tutusa le fanua o le a taeli i luga fanuaoti o aiga ua leva ona i luma o fale.
• Ua ou fiu e sue se tulafono e faataga ai se ofisa o le malo, ona faatonu faamalosi se aiga e vaelua tutusa se fanua tuusaoloto (freehold) e leai se tulafono ua ou mauaina e faataga ai se tulaga e faatonuina e le malo e vaelua tutusa se fanua o se aiga. Sa ou ta‘ua i le fale faamasino, e leai se tulafono e tatau ai i le malo ona faamalosia se vaeluaina tutusa o se fanua o se aiga, aemaise fanua tuusaoloto (freehold). O le isi vaega lea o lea ou te toe saili atili e faamausali ai la‘u mau, a o lei faaiuina lenei faamasinoga.
• Sa ou tu muamua mo le aiga lenei ina ua ave atu le tusi samania e le ofisa o mavaega e faatulai ese le aiga lea ou te tu ai mai le vaega o le fanua lea e manao le ofisa o mavaega e vaelua tutusa. Sa ou malo i le 2009 i la‘u finauga – e leai se aiā i luga o le tulafono e fai ai e le ofia o mavaega a Samoa le tagi lea na latou faia i luma o le Faamasinoga Sili (Supreme Court) e evict pe faatulai le aiga lea sa ou tu ai.
• O le 2009 faato‘ā ou tu ai i le aiga lea. O tua atu o le 2009, o loia lava a Samoa. O mea uma nei ua oo i ai a‘u suesuega e oo i aso o Siamani – o la‘u fesili i le aiga, pe aisea na lē laga ai e loia sa tutū ia latou i taimi ua mavae nei mataupu? O le tali a le aiga ma nai tagata i Samoa i luga o le fanua, o latou e lē malamalama i le faaperetania, e faamoemoe i loia.
• Ona o faamasinoga i Samoa e fai faaperetaina, e leai se eseesega ma le lē malamalama o tagata i faamasinoga i Niu Sila nei.
O le isi upu lea ou te suesueina poo ai uma tagata e i lalo o le upu peretania o “HEIRS”.
O le upu e laitiiti ae telē lona tāua i le faamasinoga lea ou te finau ai. O fanau a ai e i lalo o le upu papalagi lea o HEIRS? E opogi i lenei upu, fanau faatea faasamoa i totonu o aiga?
O le tiute o le loia o le fai o le galuega i le mea e tau i ai lona mafai, ona o ola o tagata ma fanua na alu ai afu o tuaa ma mātua ua faiilagi, e mamulu pe a lē mataala i le faiga o faamasinoga,.
O le tiute o outou o tagata o aiga o le fesili i le loia ma malamalama poo ā galuega la e tapena e loia mo outou. Fesili ae aua le fefe e fesili.
