Radio Samoa: Usi maia lau faafofoga Samoa, o lea foi ua maua le fesootaiga ma le afioga i le Palemia, Susuga Tuilaepa Malielegaoi, auā foi le faatalatalanoaina foi i le paeaiga ua amatalia ai foi le Palemene i lenei vaega o le tausaga. i le agaga faaaloalo e faatalofa atu ai i lau afioga i le Palemia, i lau Susuga Tuilaepa. Malo le soifua manuia!
Palemia: Faamalo atu foi i le tou leitio i le valaau mai i lenei itula afiafi. Faafofoga mai foi le tatou atunuu o loo e‘e ma papaaao i Aukilani i le tatou polokalame, ia faamalo le tapuaiga, o lea ua sologa lelei mea uma i le tofitofiga o le tatou malo. Ia ae lafo atu ia e amatamea mai outou, i ni a outou fesili o loo fia aumai.
Radio Samoa: O le ā se tulaga, na faamalieina lau afioga i le Palemia ia poo le Palemene foi, i le faaiuga o le palota i lenei foi paeaiga, ma le agaga faaaloalo?
Palemia: O lea o loo faaopoopo pea nofoa o le HRPP, faatusa atu i le paeaiga o le 2006-2010. Sa na o le 35, ae o lea ua toe faaopoopo le tasi, ua 36.
O se tulaga faafiafia loto lea, ma o inā foi o loo faaali manino mai ai le mea o loo iai le finagalo o le tatou atunuu, i le tulaga o le faatautaia foi o le tatou malo e lenei foi vaega faaupufai.
Ae peitai o le afiafi nei, o le asō lea ua tapunia ai le tulaga o le faauluina o talosaga. Ia ma o lea la ua logo mai le atunuu i le TV, e tusa ma le to‘a 10 moliaga ua faia nei.
O le moliaga muamua, e faia e Tufuga Gafoaoleata faasaga ia Vaai Papu Vailupe, Vaisigano Numera 1. O Tufuga o le matou sui lea HRPP.
O Vaai Papu o le taitai o le Itu Agai. O le afioga ia Loau, o le moliaga lona lua lea, o Keneti o le isi foi a matou sui, o lea o loo molia Tuisā Tasi Patea, o Sagaga le Falefa.
O lea foi e molia e Asiata Wairaki Toevai ia le afioga ia Tavui Tiafau o lē na manumalo mai Satupaitea, o sui uma ia o sui uma o le HRPP. Molia foi e Taito Faitele Afamasaga o Vaa-o-Fonoti, le afioga ia Tialavea Fea Tionisio Seigafolava.
O sui uma ia o sui uma o le HRPP. Molia e Taua Falaimo o le Itu Agai, i le afioga ia Agafili Patisela o Palauli Sisifo. O le moliaga lona ono, o Saunoamalii Finafinau, o loo molia Manu‘alesagalala o Safata. O Manu‘a lea e pei ona silafia o loo ua tofia e avea ma Minisita o Galuega.
O Pauli Tevita Tariu ua molia nei Magele Mauiliu Magele o Faasaleleaga Nu 1. O Magele lea ua Minisita o Aoga. O Fuataga Kasimani lea ua na molia foi Seuala Tauā Tavaga o Aleipata Itupa i Luga. Le Tagaloa Pita o le Itu Agai o loo molia foi Faumui Tiatia Liuga o Palauli le Falefa. Ia ma Moefaauo Lufilufi o le HRPP lea foi ua toe molia Alai‘asa Filipo Hunt o le HRPP o le itumalo o Anoamaa i Sasa‘e.
Lea la ua faafogafoga mai, o nisi a foi o le la itu e molia sui faipule o lenei itu, a o isi a o matou a sui ua toe feainai, ia ae o uiga a ia o nei mea o sailiga malo, e fai foi o le naunau i le tofi, ae auala ai foi nisi moliaga a i latou ua lē faamanuiaina si o latou taumafai. O le tulaga la lena o lea e taoto ai, lea faatoa faasalalau mai lenei itula afiafi.
O loo iai le teuteuga o le tulafono o loo iai nei, afai e te molia se sui, o mai uma ma au molimau e molia se sui o loo ua tulai i le foe i se solitulafono.
O aiaiga o le tulafono o loo iai nei, e matuā fai lelei lava lau tautoga ma lau tautinoga, e te lei solia se tulafono. E faapena foi ma au molimau.
Afai loa la sau moliaga, fai lau tautinoga, tautinoga ma au molimau, fai le tautoga, ia ona tali mai foi lea o lē ua molimau, aumai foi ni ana ia molimau e faasaga ia te oe.
A faamaonia, e tasi a le sala lea e iai i le teuteuga, o le falepuipui. O le teuteuga fou la lena o le tulafono e matuā pa‘ū a le samala i le ulu o le fao, i le tagata lea e faia le moliaga, o lana sala e lua tausaga e falepuipui ai, pe afai e maua, sa fai foi ni ana ia faatosina, ae o lea ua uma ona fai le tautinoga, e leai ni ana solitulafono.
A maua la, ona tuuaia loa lea o oe i le molimau pepelo, e tasi a la le sala a le molimau pepelo, e lua tausaga e falepuipui ai.
Ua sili atu la le matautia o le mea lea ua iai nei. E ono mālie a la iuga o faamasinoga ia o le a faagasolo nei. E ono iai nisi e falepuipui.
E ono iai nisi e tuu i le lisi o tagata faimea piopio, ona lē mafai lea ona toe alu i le faiga palota o le a sosoo ai nei, ma le faiga palota o le 2016. E fai la sina mālie o le mea e ono oo nei i ai, iuga o faamasinoga o lea o le a faagasolo nei.
