O le tuuina atu o le matou tusi i Samoa i le komiti a le autoeaina aoao i Samoa, ua tali manino le failautusi, e leai se faaiuga ua faia.
Peitai o le tali mai a le autoeaiina i Aukilani i Matu e ala i le tusi na tuuina mai i le aso 18/4/2008, o loo iai ni faaupuga faapea, e lē galo matou i la latou tatalo, ae o loo faaulutala foi le tusi lenei ma ta‘ua matou, o le mafutaga poo le auuso.
O le faasa‘oga e faapea, ta‘u pea matou o le EFKS Westmere. Na o se manatu faaalia, o le upu mafutaga e ave i le ulugalii. O le upu auuso e ave i le auuso tama, auuso teine poo le auuso faafāfine. A o matou e ta‘u o le Ekalesia EFKS Westmere.
O tamā, tina, autalavou, a‘oa‘o, faletua ma tausi, tiakono, o alo ma fanau, le malosi o le nuu, ma le loaloa o le ekalesia.
E lelei pea le faaaogā o le gagana faafaifeau ona iloa atu ai lea o le Atua o loo i totonu ia te outou.
I le tusi lava lenei o loo faaseā mai ai le autoeaina Aukilani i Matu, e faapea se‘i seu ea le manu ae tagai i le galu, o le va tapuia faaaloalo ma le tofa faale-Atua.
O ē foi sa tusia le tusi ma tuuina atu i Samoa, o loo iai le utaga poto e tuu loloto ai le faiva o faaaloalo. Ia e moni a upu o le gagana, ae ao pea ona faamanino auā o mea uma nei sa matou faailoa uma ia Ioritana.
E ta‘u manino atu pea, o upu na tusia i le tusi ma tuuina i Samoa, o loo lagona ai lo outou maasiasi auā o le mea moni o loo faafofoga le Atua e ona le gagana ma mea uma lava, e lē o se gagana lea na aoai ai i matou e o matou mātua ma faifeau na matou aooga ai.
O upu na masua mai i le gutu o le faifeau lea tou te puipui i ai. Tulou le mamalu o le aufaitau ae se‘i faamanino pea le mea moni.
Taunuu le usugafono a le faifeau i sina tausaga ua tea atu, fesiligia le teutupe ia Magele Ah Chong poo ua teu le atina‘e.
Tali le teutupe e leai, o lea ua ave le isi vaega o le tupe e faatau ai le puaa e fai ai le meaai. Fesili le faifeau poo ai le (K… taofia le upusa) na fia pule i tupe, tali Magele ua iu i ai le fono a le aulotu. Tali le faifeau ma tu‘i le laulau ma faapea mai, pe ta‘u mai o le ā lena au (k… taofia le upu sa).
O le fesili ia te oe Ioritana, o ai o aafia i upu ia? Ioe, o loo aafia uma ai tagata o le aulotu. Faamata o iloa e le faifeau le tofa faale-Atua, le va tapuia, le faaaloalo, lea tou te faitio mai ai.
O se gagana foi lea i totonu o le kolisi i Malua Theological College o loo a‘oa‘o ai? O le mea foi e ao ina manatua, o upu e luai mai le gutu e sau i totonu o le loto. Pau a lenei Ioritana, e leai sou igoa i le maa faavae o le EFKS Westmere. O lau aulotu o Grey Lynn EFKS.
Mataupu e faaauau i le vaiaso fou: Faasā faifeau ona toe o mai e fai matou sauniga faamanatuga.
