I le manatu faaalia a se tasi faifeau sinia o le Matagaluega Aukilani Matu sa ia ta‘ua ai, ana o ia o Vagatai, na ona foi mai lava i lana faamalologa faamavae loa, ona tatanu uma lava lea o isi faaletonu o tau aliali mai.
Sa fautua mai foi lea lava tamā faifeau, e fai pea matou lotu i le Hall o loo matou faaaogāina, auā o lea e lē o toe umi ae alu ese Ioritana ona see lea o le toeaina faatonu ia Lucky Slade, atonu e toe maua ai se isi faasa‘oga o le matou mataupu, ona o le taimi nei e leai se mea e mafai e Lucky ma Pouniu seiloga e alu ese Ioritana.
Peitai e manaia fautuaga ae o le faalavelave e lē gagana i taimi o tofiga a le Matagaluega. Sa ia ta‘ua foi le matou aulotu o le auuso.
Fai atu i ai pe aisea ae fai mai e fai vae o tala ne‘i te‘i ua iloa e Ioritana ma Vagatai o loo ia ta‘uina matou o le aulotu a Westmere.
Ona pau foi lea o le faifeau e lei oo atu i totonu o le Fale Faamasino i le taimi o le faamasinoga.
Sa tele foi a manatu faaalia o lea tamā faifeau i le tulaga o iai le autoeaina, ma ua mautinoa ai le femoumouai o le aufaigaluega i faaiugafai a Ioritana.
E sa‘o ai le tala a le loomatua, ‘e onosai ia mo lenei taimi auā e eseese lava fale puaa’.
Ae na ta‘ua foi e se tasi o faifeau i sona manatu faaalia, sa tatau i le autoeaina ona toe talanoaina le mataupu auā o loo manino lava le faavae o le Ekalesia i mea tau toomaga.
Na tautino foi e le faifeau lava lenei o le ekalesia i le tulaga ua iai faaiugafai a nei toeaiina, ua matuai polokiki lava le tulaga ua iai.
A agasala le faifeau ua puipui e le toeaina e maua mai ai ana faalumaga. Na saunoa foi le faifeau, sa tatau i le autoeaina a Aukilani i Matu ona fai le galuega ia foliga i le Atua, ae aua aua lava nei fia Atua.
