O le fesoasoani mo le afioaga o Apia, sa lē gata i faleaitu, ae sa avea foi ma fuataimi mo le pese tele a Apia i le latou sailiga seleni sa faataunuuina i lena vaitaimi.
Niu Sila
O le malumalu o le ekalesia Metotisi i Grey Lynn i Aukilani Niu Sila.
Ausetalia
O le ekalesia EFKS i Sini, e iai ma le isi falesa e tasi e lua i ai galuega i Sini lava ua lē manatua e le susuga ia Taavao.
O le isi galuega o le malumalu o le ekalesia Katoliko i Melepone, e iai foi ma le isi galuega ua lē manatua foi poo ai tonu le ekalesia e ona le malumalu lea.
O Brisbane e lua foi isi malumalu o ekalesia peitai ua lē mafai foi ona manatua ma faamautinoaina, talu ai o le tele naua o galuega sa fesoasoani i ai.
I Sini lava ia, sa fesoasoani foi i le sailiga seleni mo le maota o le galuega, poo le maota o le faafeagaiga.
Amerika
O ekalesia Metotisi e lima i aai ma nuu eseese o Amerika sa oo i ai le malosi ma le galuega fesoasoani a Petelo i le faatinoina o faleaitu ae sa faaaogāina mo sailiga seleni.
O galuega a afioaga ma faalapotopotoga e pei ona ta‘ua i luga ua silasila ai ma faamaonia le telē o le sao ma le fesoasoani o le meaalofa ma le taleni a lenei tamalii mo soo se faamoemoe lava i le atinaeina o ekalesia ma afioaga, o kamupani ma ekalesia taitasi. E lē gata i lea, ae sa faapea foi ona atinaeina ai lona lava aiga i soo se vaega e pei foi ona faamautu ai nei i Amerika.
E lē gata i lea o le isi itu lelei ma le aogā o lana taleni, ua mafai ai ona asiasi ma oo atu ai i le tele o atunuu o le Pasefika ma isi itu o le lalolagi e pei ona lisiina i lalo.
Sa iai foi le taleni o le faifaili, sa iai le latou faili uila sa faaigoaina o le Sound of Music.
O le koneseti muamua a le autalavou a le ekalesia Katoliko sa faasavali i Upolu ma Savaii, sa faamaonia ai isi agavaa ma taleni e pei o le fai ma fitafita, faifaaipoipoga, faapea ma le avea ma tupu o le tala sa faatinoina.
O atunuu sa asiasi i ai Petelo e ala i le taleni sa faaaogāina i ai lona soifua auauna Niu Sila, Ausetalia, Hawaii, Fiti, Tonga, Niue, Hong Kong, Amerika.
O le taimi nei ua faamautu ai pea ma ua alaala nofo mau ai i Amerika, peitai o loo faaauau pea le taleni faifaleaitu.
O nisi o tamalii o le atunuu sa tele so latou sao ma mafua ai ona luitauina Petelo mo le faaaogāina o le taleni. E lē gata foi i lea o nisi sa iai faatasi i le taleni faifaleaitu i Samoa lava.
O nisi sa ta‘ua ua maliliu peitai e lē mafai ona faagaloina e Petelo lo latou vaitaimi sa galulue faatasi ai ma fetufaai o latou agavaa.
O Lavea Levi, Fuiono Seiuli Faaiuaso ma Pat Mamaia, o sui o le leitio faasalalau a le atunuu le 2AP.
O le alii faifaleaitu lauiloa sa iai i lena vaitaimi o Siaki o Faga i Savaii, Ioelu o Toamua ma Puleia i Savaii, Taai ma Sale o Fagaloa ma Lona, Makiasi o Safata, Peteru o Salelologa, Mika o Samatau, Filivae o Samatau, Elefasa o Lufilufi, Ioane o Lalovaea, Niko ma Eletise ua lē manatua o la afioaga.
