E lei faigofie le tau sailia o se isi toalua o le aitu Samoa e aumau i le malo tele o Amerika, talu ai e lei mafai ona talia e le faamasinoga le tusi e tatala ai le isi faaipoipoga sa faia muamua, atoa ai ma le isi tautoga fai faamalosi o loo iai nei.
E ui i lea ua iu le filifiliga a Petelo, o le a toe faaipoipo atu ia Tupai Faasalafa mo sina vaitaimi.
E tailo foi i le logologoā o tala o le aitu tautaua o Samoa o Moso i le taimi o le vavau, pe tutusa ma le tautaua ma le aave o tala o le aitu faimeamalie o loo faananau i ai le toatele o le atunuu, le susuga ia Taavao Petelo.
O se tamalii o le atunuu ua tautaua ma e lē toe tau faailoina le taleni e ala i le mālie ma le aati foi o nai ana fatuga e ala i faleaitu.
E maua le ata, ae maua ai foi ma le tui i nisi o taimi i ana saunoaga ma faamatalaga. E ui lava ina matautia ma matuitui ana faaupuga i le taimi o faleaitu, peitai e magalo mea uma i finagalo o le lautele, ona o le taleni ma le mealofa ua faaaogāina ai lona soifua.
E lua vaiaso ua fuafua e iai Petelo i Niu Sila, ona toe malaga ai lea i lona atunuu o loo
faamautu ai mo lenei vaitau. O le iai o Petelo i Niu Sila, ua faapea foi ona faasalalauina ai ma ana faafiafiaga o le a faataamilo i Aukilani ma Ueligitone a o lei toe taliu i Amerika.
O se feiloaiga ma le susuga ia Petelo e pei ona lausilafia ai, sa ia ta‘ua ai o le a iai ni suiga fou mo ata o le a faaemo mo faaaliga ua faapolokalameina.
O se tasi o suiga e pei ona faamaonia mai e Petelo, e aofia ai lana paga poo lana faaipoipoga fou faato‘ā faamaonia i le vaiaso talu ai. E pei ona silafia o le susuga lava ia Sumeo e masani ai mai le tele o tausaga ua mavae, peitai o le isi lea ua suia nei i se tasi foi o tamalii, ua vevela foi ana faiga i lenei vaitaimi. O le susuga i le alii faiaoga ia Tupai Faasalafa, o se tasi foi o tamalii lauiloa o le atunuu i le tulaga o le tuufaatasia o pese faa-Samoa, lea ua faamaonia o le a paga ma toalua ma Petelo i taamilosaga ua fuafuaina.
Saunoa Taavao e faapea, e ese foi le tulai mai o Tupai i lenei vaitaimi, ma o se tagata ua lava tapena foi mo le tulaga moomia, ma e fetaui lelei foi ma nai ana gaioiga ma ata pupuu e faatino ai le faamoemoe.
O se taimi muamua lenei ua mafai ai ona tuufaatasia Petelo ma Tupai talu mai se vaitaimi umi. Atonu o se avanoa lelei foi lea o le a silasila ai le atunuu pe faapefea se taumafaiga a le paga fou e pei ona amataina.
O le faaiuga o le vaiaso nei i le Aso Faraile, aso 7 o le masina nei lava, o le a tatala ai faafiafiaga a Petelo ma Tupai i Otara.
O le nofoaga masani le Otara Recreation Centre o le a faataunuuina ai.
O le po o le Aso Toonai soosoo ai o le vaiaso nei lava, o le toe liliu ane ai ma faia le siou lona lua i Magele i le Malaeola Hall.
O le vaiaso o muamua o le a see ai mo le mamalu o le atunuu o loo alaala ma papaaao i Aukilani i Sisifo. O le a faia lea i le Civic Centre, sosoo ma le West Wave i Henderson. A mae‘a lea ona liliu loa lea ma agai e faamalie manaoga o le mamalu o le atunuu o loo faatalitali mai i Ueligitone mo se faaaliga e tasi o le a faia ai. E faamoemoe e toe taliu mai i Aukilani ma tapena ai se isi faaaliga mulimuli, ona saunia ai loa lea e toe taliu i Amerika.
O le susuga ia Vili Ieru ma lana kamupani o le Vision and Cassette World o loo lagolagoina malosi lenei taamilosaga a aitu Samoa i Niu Sila. Sa faaalia foi e le susuga ia Vili Ieru lona agaga fiafia tele ina ua mafai ona faigofie ona malilie ane ia tamalii o le atunuu ina ia tuufaatasia lea faamoemoe ma faamāmā avega ai foi i lenei vaitaimi faigata mo le mamalu o Samoa i Niu Sila.
Saunoa foi Vili e faapea o ata uma o le a faaalia e Petelo ma Tupai, o ni ata fou uma lava, ma o le faamoemoe foi lea o lenei taumafaiga, ina ia mafai ona silasila le mamalu o le atunuu, i nisi meafou, ma faleaitu fou e ese mai foi ona malie nai lo le tele o isi ata ma faleaitu muamua.
E 3 faaaliga o le a faia i Ueligitone, ua fuafuaina o le Aso Tofi, aso 14 o Oketopa o le a faia i Taita Community Hall. O le Aso Faraile, aso 15 o Oketopa, o le a faia i Pahine numera 13 Kivell Rd i Porirua East. O le Aso Toonai, aso 16 o Oketopa o le a faataunuuina i le nofoaga o le PIC i Niutone.
O fesootaiga uma mo faaaliga e pei ona fuafuaina o le a mafai ona fesootai ane i le susuga ia Vili Ieru i le telefoni o le ofisa
09 276 7229 poo le telefoni feaveai 021 1427 234. Mo Ueligitone, o le a maua faamatalaga uma i le susuga ia Nuualiitia Fafo i le telefoni 04 970 2860.
