Talofa lava, malo le onosai mo galuega o lenei vaiaso, e leai se mea e maua ma se filemu. E faamalo faapitoa foi mo tamā ma tina matutua o le atunuu, i le tapuaiga ma le tatalo, o a lava tauiviga ma vanu loloto o le soifuaga e feagai ma i tatou, ae ia mausali pea lo tatou talitonu ma le faatuatua i lo tatou Matai Sili e maua mai ai lo tatou fesoasoani.
Ae o le faaauauina lenei o le vaega mulimuli o le talaaga o le soifua galue ma le tautua o le susuga ia Taavaomalii Petelo Asomua e pei ona sa amata atu i le vaiaso talu ai.
Taavaomalii Petelo Asomua (Faifaleaitu tautaua Samoa)
Soifua galue/Galuega
Sa muai galue i galuega leipa mo tagata lautele i le kamupani a Koki, ona sosoo ai lea ma le kamupani a Molesi.
O le tausaga e 1967 na amata galue ai mo le kamupani a Nelesoni, ma o le tausaga muamua foi lea sa amata ai ona faatino le taleni faifaleaitu sa ia fiafia i ai.
Na faaiu i le kamupani kamuta a le afioaga ia Fuimaono Tupuatala.
O galuega tetele sa fausia i lena vaitaimi e iai le fale tifaga a le Savalalo, faapea ma le faleaoga a le aoga a Taupousa i Savalalo lava.
O le tauvaga sa tuufaatasia e le kamupani a Nelesoni i le tausaga lava lea, mo le faamanatuina o le Senitenari o le kamupani, sa feiloai ai loa Petelo ma le mamalu o isi tamalii faifaleaitu o le atunuu.
O le susuga ia Siaki, Ioelu, Taai, Sale, Makiasi, Ioelu toeaina, O Mika, Elefasa, Ioane, Niko, ma Eletise faatasi ai ma le au sa faaigoaina o le Au Ulutatagi poo le Au Ulupopoo e pei ona sa lauiloa ai i lena vaitaimi.
Ata ma tala pupuu sa faatinoina
O le ata sa faatinoina muamua o le tala i Vaa Feoai, atoa ai ma le vaaiga o Tala o le Tau ma Tuugavaa.
O le tauvaga lava ia, sa faatino ai loa le tala i le Laau Kerisimasi ma le Faatauoloa. O le tala i le Laau kerisimasi na tulaga muamua ai i le tauvaga sa tuufaatasia e Nelesoni.
E manatua pea le susuga ia Filivae mai le afioaga o Samatau sa fai ma laau kerisimasi, ma e talitonu o se tasi o tala sa matuā lauiloa ona o le malie ma le faatinoina o aga sa faaalia.
Galuega tetele sa faaaogā i ai le taleni a Petelo e ala i sailiga seleni i Samoa ma isi atunuu (Falesa poo Malumalu tapuai, Maota o Faafeagaiga, Faleaoga, Falemai, Fale Komiti.
O afioaga nei sa manaomia tele ai le fesoasoani a Petelo ma lana taleni i le tulaga o sailiga seleni ma tupe mo le fausiaina ma le tau amataina o Malumalu tapuai.
E lei faapito foi le auaunaga mo na o se ekalesia e tasi, peitai sa fiafia le faifaleaitu e faasafua ma faaaogāina lana taleni mo le atinaeina o galuega mo soo se ekalesia i totonu o le atunuu, ae faapea foi isi atunuu i fafo o Samoa.
Samoa
O le malumalu muamua o le Falesa o le ekalesia Metotisi o lona lava afioaga i Faleapuna. Ona sooo ai lea ma le malumalu o le ekalesia EFKS i Lotopa, o le Metotisi i Tafua i le motu i Salafai.
O le ekalesia Mamona i Faleapuna, o le malumalu o le ekalesia Katoliko i Falelatai, ma Nofoalii, faapea le malumalu o le EFKS o le afioaga o Fasitoouta.
O le faleaoga, o le falemai, ma le fale komiti o Faleapuna faapea ma le falemai o Lufilufi. O le fale komiti o le afioaga o Gagaifo i Lefaga ma Faleasiu, faapea sailiga seleni mo le vaipaipa o Faleasiu lava.
O le isi galuega tele sa oo foi i ai le auaunaga ma tautua a Petelo, o le Maota o Tina o le atunuu, poo le Fale o Tina i Matafele i totonu lava o le taulaga o Apia.
O le tausaga e 1968 sa faavaeina ai lea galuega ma sa malosi i ai lana fesoasoani e ala i le tapenaina o faleaitu ma faafiafiaga.
