O le Kalapu a Ponsonby e pei ona sa ta‘ua i se tasi foi o a tatou tusitusiga, o loo faatumulia i alo ma fanau a Samoa.
O le au a le fanau i le vaega i lalo o le 9 tausaga (Under 9), o Samoa uma lava e leai ma se isi e ese ai, e faapena foi ma Faiaoga le Susuga ia Ricky Tuua ma le faiaoga lagolago ia Samuel Jackson.
O le au lea na leai se faiaina i le tausaga na tea nei 2009, ae ua mae‘a le Taamilosaga o le tausaga nei e na o le tasi lava le faiaina i le au a le Kalapu a East Tamaki, i se taaloga mataina tele ma le finau. E ui i le eseese o le vaaiga i tino o tamaiti ma tausaga e foliga e masalomia ai o latou tausaga, ae na matagofie lava le finauina o le malo.
O le saunoaga a le susuga a Ricky Tuua le faiaoga na ia saunoa ai, ua lua tausaga talu ona ia tauaveina le au a le Under 9 lenei ae ua matuā faafiafiaina lava i le tulaga lelei ma le alualu i luma o taaalo a tamaiti, ua ia faamautuina foi lona naunau pea i lea au e na te toe tauaveina mo le tausaga fou, aemaise o lona manao ina ia faatumauina pea tamaiti i lana au.
O se tasi o alo ua vave tele lona lelei ma le saoasaoa, o le alii o Altar Nua lea na ia mauaina le Most Improve Player o le tausaga, e faatusa i le tele ma le vave o lana maitauina o le taaloga. E iai le faamoemoe o le a agai pea i luma ma tulimataia foi nei alo laiti o le atunuu mo le lumanai o aiga ma le atunuu.
