O le siufofoga o Lavea, aemaise o fesuiaiga o ituaiga leo eseese mai ia Fuiono, sa momoo i ai le aitu Samoa. Na saunoa Taavao o isi ia faiaoga tautaua, ma e manatua pea i lona finagalo le sao o ia tamalii i lona soifua aoaoina.
O le tuufaatasia o faleaitu ma ata pupuu a Petelo, sa amata mai ona o se tauvaga sa tuufaatasia e le kamupani a Nelesoni i le tausga e 1967. O se faamoemoe sa faato‘ā fetaui ai Petelo ma le toatele o nisi foi o aitu mālie o le atunuu sa amataina ona faalauiloa lea taleni ma agavaa.
O le tauvaga tele sa faataunuuina, sa maitauina ai le agai i luma ma le faatupulaia o le taleni i totonu o le atunuu. E fai o i latou e fou atu i le taaloga, a o tama matutua ua leva ona iai ma faafoeina le taleni.
Ae na ta‘ua e Taavaomalii e faapea, o le manaia ma le susua o lea foi tauvaga faleaitu tele, ona e fai ane, ae ua mae‘a ona faia ana aoaoga ma ana faatinoga eseese e faaaogāina ai lona tomai sa aoaoina mai i faiaoga papalagi ma faiaoga Samoa e pei ona ia tautino ai muamua.
O le tauvaga foi lea sa tofotofoina ai lona agavaa ma lona faatinoina o le taleni, ma silafia ai po ua alagatatau ona faaauau, pe o le a sui loa se isi laasaga.
Ua see le sā o Petelo, ma na maoae le tulai mai o lona faamoemoe i le tauvaga sa faia, ma o le taimi lava foi lea sa faamautu ai loa i lona finagalo, e leai se isi galuega ma se isi faamoemoe o le a faasaga i ai, ae ua na o le faifaleaitu lea ua numera tasi i lona mafaufau.
E iai lava galuega sa galue ai Petelo, peitai ina ua tulai mai lona vaitaimi ma ua amata foi ona faatāuaina le faleaitu, ma faamuamua o se galuega mo ia mo le atinaeina o lona aiga.
O le taimi tonu lea na ama ai le silasila i galuega a kamupani sa iai, ae ua sasaa lona malosi e atinae ai le taleni o faleaitu.
O le tele lava la o le soifua aoaoina o Taavao, sa maua lava i totonu o lona aiga, o lona nuu, atoa ai ma le taimi o le sailia o taleni ma le faatinoina o le meaalofa a le Atua i lona soifua.
O le vaiaso fou o le a silasila ai loa ma faitauina nisi o galuega sa auauna ai lea tamalii o le atunuu i totonu o kamupani a le malo o Samoa.
E lē gata i lea a o le taimi sa afuafua mai ai lana taleni, aemaise o lona aogā tele ma le faaaogāina e fesoasoani ai mo nuu ma afioaga ma le galuega a le Atua.
O le a faaauauina foi i le vaiaso fou, isi vaega o le soifua galue i atunuu i fafo, aemaise lava o le tele o vaega sa faaaogāina ai Petelo e aulotu, o komiti, o faalapotopotoga e oo lava i aso faalemalo.
O le faafeagaiina o le vaivai i le itu tau aoaoga, atoa ai ma le liliuina o le taleni e avea ma faamanuiaga mo ia ma lona aiga, aemaise ai o tagata lautele o lona lava atunuu.
