Ua mae’a le Taamilosaga Taitoafitu a le Oceania Champioship sa faia i Darwin i Ausetalia i le faaiuga o le vaiaso, lea sa auai le tatou Manu Samoa 7s.
O le iuga o lea Taamilosaga na sue siamupini ai le Manu Samoa ma le au a Ausetalia, ma malolo ai le Taitoafitu a le atunuu i ‘ai e 12 – 32 a Ausetalia le atunuu na tali malo i lea taamilosaga, ma ua Siamupini ai Ausetalia i le taamilosaga a o faasauni atu mo taaloga o le Taupulega. O se lipoti mai Ausetalia na faailoa ai le sao o Samoa i le Final ina ua manumalo uma ana taaloga i le Pool Games, lea na taaalo ai ma Papua Nini Kini, Tahiti ma Niue, ma taaalo ai loa ma Vanuatu i le Semi Final ma manumalo ai.
O le taaloga ma Ausetalia na faaalia faapea e mataina le finau o au e lua ae o le tele lava o mea sese na faaletonu ai le taaloga a le Manu Samoa ma toilalo ai, ua agai atu nei le ‘au i Initia mo tapenga o Taaloga Taitoafitu o le Commonwealth lea e amata i le aso 11-12 o le masina nei.
Peitai o se tala faanoanoa tele mo tapenaga a le Manu, ona o se tasi o alii faamoemoeina o le ‘au, le susuga a Alafoti Faosiliva lea ua le mafai ona malaga i Initia e faaauau taaloga o le Taupulega ina ua faamanualia i le taaloga mulimuli ma Ausetalia.
O Alafoti o se tama matua o le Taitoafitu a Samoa ma o ia foi o le tama taalo o le tausaga a le IRB 7s i le Laina i Luma (fowards), o loo faapea foi ona faamanualia ai ma nisi i le faaiuga o le vaiaso e pei o Sani Niue, Levi Asi ma Leia Saofaiga, lea foi ua faamaonia le le malaga i Initia.
E le na o Alafoti le sui tuai o le Manu ua le avanoa, ua faamaonia mai foi le le malaga o le alii o Apelu Faaiuga ona o le valaau a le Atua i si ona tama i Samoa. E toalua nisi alii fou lea ua sui tulaga atu mo Alafoti Faosiliva ma Apelu Faaiuga, o i laua ia o Falemiga Selesele ma Taulagi Afamasaga.
Na faailoa e le Faiaoga a le Manu le aoga tele o le Taamilosaga nei mo tapenaga o le Commonwealth, e ui ua faamanualia nisi o ana tama faamoemoeina, ae o nisi nei o iuga o taaloga a le Manu Samoa 7s i Ausetalia i le faaiuga o le vaiaso.
Game 1: Samoa vs. PNG – Samoa won 24 -7 to PNG
Tries: Sani Niue 2, Mikaele Pesamino 1, Fautua Otto 1, Conversions 2 Fautua Otto
Game 2: Samoa vs Tahiti – Samoa won 48 – 0 to Tahiti
Tries: Alatasi Tupou 4, Mikaele Pesamino 1, Fautua Otto 1, Levi Asi Faamatala 1, Alafoti 1, Conversions 2 Alatasi Tupou
Game 3: Samoa vs Niue. Samoa 31, Niue 5
Tries: Mikaele Pesamino 1, Apelu Faaiuga 1, Alatasi Tupou 1, Sani Niue 1, Taulagi
Afamasaga 1. Conversions Apelu 1, Alatasi Tupou 1, Paul Chan Tung 1
