Talofa lava! O lenei vaiaso o le a toe liliu lo tatou sā ma le tatou itulau i Samoa. O loo maua pea le avanoa e felafolafoai ai le tatou galuega pe afai ae maua avanoa o tamalii ma le mamalu o tamafanau a le atunuu e malaga mai i Niu Sila. E toatele naua ma anoanoai le mamalu o le atunuu sa ausia ma oo foi i le tulaga tāua le auaunaga ma le tautua aemaise ai o le galulue ma le punouai mo le manuia o tagata lautele o Samoa.
Ua filifilia se tasi o tamalii ona talu ai e seāseā lava foi ona maua se avanoa, ma e mamao foi nofoaga o loo alaala ma papaaao ai, peitai o le iai i Niu Sila nei mo lenei vaitaimi ua manatu ai, atonu o lona taimi lelei lea mo le tatou galuega.
Ua e faitauina ma ou vaavaai foi i nisi sa faaaogāina o latou soifua auauna e ala i le poto salalau aoaoina, a o nisi foi sa faamealofaina e le Atua e ala i taleni ma le atamai aoaoina i aso uma, atoa ai ma galuega o loo tautua ma auauna ai.
O vaega matautia ia tatou te molimauina ai le alofa ma le agalelei o le Atua i o tatou tagata.
E tele vaega ma itu e tulaga ese ai tagatānuu o Samoa i le Pasefika ma le lalolagi atoa. O aso anamua sa tautaua i le folau i luga o le sami, ma sa ta‘ua ai o tagata folau o le vasa. O le agai mai o senituri ma faasolo atu vaitaimi o le soifuaga, sa aliae ai le tulaga ese i ana tu ma aga faaaloalo.
O lenei vaitau o le poto ma le atamai aoaoina, ma le va ma isi atunuu tetele, aemaise ai o le faailoaina o taleni ma agavaa fatufatu e ala i musika, tala faafagogo, ata tifaga ma faiga, ma aga malie.
O le faaaogāina o le taleni ma liliu ai e avea ma tamaoaiga mo le atinaeina o aiga, ekalesia, aoga, komiti, o le soifua maloloina, aoga e oo lava i le atunuu ma le malo o Samoa, o se tulaga maoae ma le matautia pe a vaavaai ma maitauina.
Atonu sa manatu faatauvaa i ai nisi, peitai o lenei vaitaimi o le soifuaga ma le olaga ua tatou iai, ua ese foi lona tulai mai.
O Taavaomalii Petelo Asomua, o se tamalii faifaleaitu, toe faimeamalie. Ua logologoa ona tala i le mālie tele o ana fatuga ma ana tala e faatino ai ana ata pupuu.
Ua fai ma auala ua avaga i ai ma tuinanau i a i le toatele i le fia faalogologo ma le fia maimoaina o ana ata.
E tele atunuu o le lalolagi sa malaga i ai ona o le faaaogāina o le taleni. E tele foi le tamaoaiga ua faamanuiaina ai ona o le taleni. E anoanoai ekalesia, ma aoga, ma isi faamoemoe tāua o le atunuu, ua mafai ona faatino le tele o atinae, ona o le taleni a le susuga ia Petelo e pei ona silafia ai, tulou le suafa Taavaomalii.
A silasila la i ai, ua mautinoa ai le tele o le sao o lenei tamalii o le atunuu i atinae ma le fausiaina o le tamaoaiga i soo se vaega.
Taavaomalii Petelo Asomua
(Faifaleaitu, Faimeamalie)
Aso Soifua: 29 Aukuso 1943
Afioaga: Faleapuna, Saoluafata, Lotofaga, Matatufu, Poutasi Falealili, Falelatai
Tuaa: O lona tama o Patelesio Lolesio Asomua e tupuga mai i le afioga ia Tialavea Poge o le afioaga o Faleapuna i Upolu.
O lona tina o Kalala Tuatagaloa Meleisea i Falealili. Na soifua ae lava Taavao i totonu o le afioaga i Faleapuna, peitai e pei o upu a le atunuu e tele aa o le laau, peitai e sili ai ona tele aa o le tagata tulou.
O afioaga e pei ona ta‘ua i luga, o afioaga uma ia e iai ona sootaga ma faia vavalalata e afua ai ma fesootai lelei ma gafa o le afioga ia Taavao Petelo Asomua.
